Wir Abt Fridrich und die Samnung datz Chremsmunster tu^en chunt allen den, die disen brief ansehent oder ho^erent lesen, daz wir daz gu^et datz sunnleiten gechauft haben umb zwainzk phunt phenning und haben dazselb gu^et verlihen tze leibgeding Ulrihen dem Pazmanne und seiner hausfrawen also mit so^elher beschaidenhait, daz er Ulrih Pazmann die phenning an dem chauf halb geben sol und sol auch von dem selben gu^et alle Jar geben sehzk phenning in unser Gustrai und in die brostai dreizk und nah ir baider to^ed sein und seiner hausfrawen ver Geiseln sol daz vorgenant gu^et ledichleich, geho^eren in unser Gustrai an allen chrieg. und dar u^eber geb wir im disen brief mit unsern baiden Insigeln ze einem waren u^erchund. Diser brif ist geschriben und gegeben do von Christ bu^erd waren ergangen Tausent und Driuhundert iar und Neun Jar.

Source Fulltext: OÖUB 5 (Wien 1868) S. 615, Nr. XXI (Anhang)