Ich Heinrich von Rappach, purcraf ze Ror und Rihter ze hall vergich an disem brief und tuen chund allen den, di disen brief lesent oder hoerent lesen, daz ein chrieg ist gewesen zwisshen Probst Chunrad von Ranshoven und hern Meingoz von waldek, chorherr von Pazzau und pharrer ze syernich umb ein guet datz Poesenprunn, do ward ein tach umb gegeben hintz obern Ror und daz solt ich Heinrich von Rappach in payden Ryhten ze gewinne oder zu verluste, do ward der vorgenant chrieg paydenthalben lazzen an shidleud, swie sez shiden, daz solt staet und gantz beleiben; do ward Probst Chunraden von Ranhoven beshayden, er solt hern Meingoz von waldek, chorherr ze pazzau und pharrer ze syrnich geben syben phund wienner phenning furbaz fur all ansprach, fur sich und fur sein goteshaus, daz ze syrnich. daz di shidung staet und gantz sei, dar uber gib ich disen brief zu einer warnung und zu einer vestenung mit meinem insigel. des sind di leut gezeug, der namen hernach geshriben stend: daz ist Probst ainbeich von sant Florianshaus, daz ist ein Rytter, her ulrich der Rot, daz ist ein Ritter, her Ditmar von aystershaym, ein Rytter, her hainrich der streler, ein ritter her Hainrich von achleyten, her Leutold von Pernau, der shekche von steire, ditrich der peuzzell und Hainrih, Chunrad, ortolf di synzendorfer, ulrich und fridreih von ort. do ist gewesen von Christes geburt, Tausent iar, dreu hundert iar und in den dritten iar an sant Johanstag ewangelist.

Source Fulltext: OÖUB 5 (Wien 1868) S. 601-602, Nr. VI (Anhang)