IN nomine Sanctae et Individuae Trinitatis Amen. Otacharus Dei gratia Dominus regni Bohemiae, Dux Austriae et Marchio Moraviae omnibus in perpetuum. Cum quarumlibet actionum mater sit intentio principalis, circa religiosas personas regalis merito versatur intentio, qui calcatis mundi illecebris contemplantur caelestia et possunt hostiam tanquam electum genus sacerdotij pro peccatis offerre cottidie delinquentium. Hinc est, quod nos Cenobium sive Claustrum Ordinis Sancti Benedicti in Chremsmunster pijs ac paternis visceribus amplexantes propter orationes eorum devotissimas et nostrorum peccaminum ablutionem ipsorum precibus consequendam ipsi claustro liberaliter indulgemus victualia universa, quae ipsis per districtus nostrarum mutarum quocunque tempore deducantur, ut sine muta transeant, impedimento et exactione qualibet praetermissa. In cujus rei testimonium praesens scriptum nostrae Majestatis charactere fecimus insigniri. Testes autem hujus rei sunt Witigo scriba Anasi, Heinricus Pincerna de Habspach, Chunradus de Himperch, Otto de Haslaw, Chunradus de Zelking, Albero de Pollenhaim, Dietmarus de Styra, Ulricus de Lobenstain, Ulricus de Capella, Hadmarus de Liechtenverd, Heinricus dapifer de Gritschenstain et alij quam plures. Actum anno Domini MCCLV. datum in Chrems per manum magistri Arnoldi nostrae curiae notarij.

Source Fulltext: OÖUB 3 (Wien 1862) S. 219, Nr. 225