Ich Hainreich der Prenner, die zeit amptmann vnser vrawn gotshaus zu Newnburch Chlosterhalben Vergich - daz fu^er mich chom an offen rechten dez erbern hern hern bartholmee, die zeit techant vnser vrowen gotshaus zu Newnburg anwalt, sein schaffer Jo^erig, vnd clagt an dez selben seins herren warten vnd nach seiner vrchund prief sag hincz ain mu^el vnd hofstat weingarten daran mit aller zugehorung genant die cristoffer mu^el vnd leit an dem weidnik pach pey obern weidnik zunachst dez eypfs mu^el, do man alle iar von dient vnser vrawen gotshaus zu grunt dienst an sant merten tag Sechs vnd zwainzig wienner phennig - vnd fumf phunt gelts zu vberzins zu der Scho^enchapellen zu Newnburch - vnd clagt gen ger egenanten mu^el - daz die pawlos la^eg, do von der scho^en chapelln ir purchrecht ab gieng, wann er pracht ain brief fu^er recht der sage, wann man die mu^el mit aller zugehorung nicht het in guten mittern paw, vnd daz sie daz egenant purchrecht wol getragen mo^echt, vnd daz daz zwen erber mann spra^echen, den zu trewen vnd zu glauben war. So sollen all die von der Mu^el geschaiden sein di rechtens dar an ja^ehen, vnd solt man dem egenanten herrn dem techant, oder wer der scho^en chapelln verweser wa^er, an clag vnd an fu^erbot ain pehabprief vber die mu^el mit aller zugehorung geben - vnd pat gericht nach dez selben prief sag, vnd vragen, waz recht waer, do vragt ich vmb, do wart ertailt zu dem rechten, ich solt im geben zwen erber mann, daz die di mu^el mit aller zugehorung schawten, Ob die pawlos la^eg oder nicht, vnd solt daz Fridreichen den En vnd sein son Nyclasen den En wizzen lazzen, wann si der mul an nucz vnd an gewer sazzen vnd auch rechtens daran iahen, vnd all die rechtens dar an ja^ehen, Christen vnd Juden vnd gescha^ech darnoch was recht wa^er. Dor noch chomen fu^er recht die zwen erber - vnd sagten, als si zu recht sagen scholten, daz die egenant mu^el mit sampt dem weingarten daran vnd der Mu^elgraben alz pawloz la^eg, vnd war nicht alz tewr, als daz purchrecht, daz dar auf waer. Do geviel mit vrog vnd mit recht, seit die mu^el pawlos lag mit aller zugeho^erung, als die erbern Lewt haben gesagt, Ich solt den schaffer an seins herren stat dez techants der Mu^el vnd dez weingarten daran mit aller zugeho^erung gewaltig machen, vnd an die gwer seczen - Es geviel auch mit vrog vnd mit recht, Ich solt im der rechten mein pehab prief geben, Daz han ich alles volpracht Mit vrchund des priefs versigelt mit mein aigen insigel, auch sint der sach zeug mit iren insigeln die zwen erbern mann Fridreich der keydinger vnd Jans der Plo^edel, die zeit paid des Rats der Stat zu Newnburg, wann si paid die mu^el mit andern erbern lewten peschawt haben - Der prief ist geben drewczehen hundert Jar dar noch in dem siben vnd Achczigisten Jar dez nachsten vreytags vor sant Perthlme tag, dez heiligen zwelifpoten.

Source Fulltext: ZEIBIG, Klosterneuburg (=FRA II/28, Wien 1868) S. 46-47