Wir Johanns von gots genaden Bischolff ze Gurk Bekennen - Das vns als einem Gerhaben der hochgeborn vnserer lieben herren graff heinreichs vnd graff Johanns Meinharts von Go^ercz der Erber Hainreich der Aczenprukker mit seinem offen brieff aufgegeben hat alle die lehen, die er von der herrschafft ze Gorcz gehabt hat. Als sy mit namen hernach geschriben stent. Des ersten ein halben zehenten ze Tawtendorf, ein halben zehenten ze eberhartstorf vnd ein halben zehenten ze O^ed, vnd pat vns mit ganczem vleyzz, daz wir dy selben lechen alle verleichen scholten den Erbern Vlreichen dem Traysmer, vnd philippen dem Strewzzel hoffmaister zu Newnburgk, haben wir seine fleyzzige pett angesehen, vnd haben den vorgenannten - die vorgenanten lechen alle gewrlawbt - vncz das die vorgenanten vnser herren von Go^ercz zu irn tagen choment vnd ire lechen selb verleichen werdent, was wir In als ein gerhab von rechtswegen daran geurlawbn schulln oder mugen, doch der selben vnserer herren von Gorcz lechen rechten ze behalten. Mit vrkund dicz briefs versigelt mit vnserm anhangundem Insigel. Geben ze Wyenn am Phincztag nach Dyonisi - drewczehen hundert iar darnach in dem Sechs vnd achczigistem Jare.

Source Fulltext: ZEIBIG, Klosterneuburg (=FRA II/28, Wien 1868) S. 43