ICH Vlreich Missendorfer vnd ich Cecilia sein hawsfraw wir veriehen vnd tun chund offenleich mit dem brief das wir recht vnd redleich geben vnd ausgeczaigt haben zu rechtem Eribtail vnd aygen vnserm lieben sun hern wolfgangen charhern zu herczogburch all vnser pawmstet aw waid vnd wasser was des ist das da gehort zu Maricharczvrfar nichtz ausgenomen das selb guet mit allem rechten vnd nuczen als wir es in freyem aygem nucz vnd gewer her pracht vnd Inn gehabt haben haben wir ledichleich gancz vnd gar geben vnserm vorbenanten sun hern Wolfgangen indas goczhaws ze herczogburch zetrost vnd ze hayl vnsern vadern vnd vns vnd vnsern chindern vnd all vnsern eriben vnd frewnten gedachtnu^ezz das wir lemtig vnd auch tod thailheftig werden aller guttat dew daselbs volpracht wirt vnd das wir nicht geschaiden werden mit der chlainen gab vnsers willen vnd der grossen miltichait des almechtigen gocz vnd das hinfu^er von den andern vnsern chindern vnd allen vnsern frewnten vnserm vorbenanten sun hern Wolfgangen Missendorffer vnd dem goczhaws zu herczogburkch an dem vorbenantem guetern zu Maricharczvrfar chain chrieg oder zuespruch vnd anual nicht auf erste vnd sew liepleich in dem dienstcz gocz wesiczen mugen nach vnserm abgankch darvmb zu warer vrchund der goczgab gib ich vorgenanter vlreich der Missendorfer meim svn vnd dem goczhaws ze er den brief versigelt mit meim anhangundem Insigel vnd zu pesser sieherhait vnd vestigung hab wir fleissichleich gepeten dew Edlen Giligein den floyten vnd Wolfgangen den Schawhinger das sew paid der sach geczewg sind mit yeren paiden anhangwnden Insigeln Inn vnd yeren eriben an schaden. Der prief ist geben nach christi gepurd vierczehenhundert iar darnach in dem dreisgistem iar an vnser frawn tag zu der Schidung.

Source Fulltext: FAIGL, Herzogenburg (Wien 1886) S. 411-412