Ich Ortlieb der stereiner. vnd ich chunrat der puster. vnd ich peter der laicher, vnd ich peter der herbler purger ze drosendorf wier vergehen vnd tun chund offen war an disem prief alln leuten. Das vmb den chrieg den der erber geistleich herr Probst Seyfrid ze den zeiten ze Herzogenburch von seyn vnd von seyns gotshaus wegen an aym tail, vnd von Perngner oerleugs son vnd seiner erben an dem andern tail. vmb den hof ze Hart vnd vmb allez daz. daz von alter dar in gehort hat. daz der vorgenant herr der Probst vnd auch der vorgenant Perngner dez vorgnanten chriegs hinder vns vorgnant vier gegangen sint also beschaidenleich. waz wier zwischen in erfunden, vnd dar v^eber spraechen. daz siv daz paydenthalben stet scho^elden haben vnd daz iz da pei hin fur ewichleich weleibn schold. vnd wer daz v^enter in payden prech. daz der belibn wer den erbern herren herren Eberharten vnd herrn Hainreich von Walse ze den zeiten hauptleuten ze drosendorf oder iern erben. oder wer ze den zeiten hauptman ze drosendorf ist, hundert phunt phennig wienner muncz vnd vns vorgnanten vier schiedleuten auch hundert phunt phennig. vnd dar nach so hab wier zuischen in paydenthalben also gesprochen, daz der vorgnant herr der Probst dem vorgnanten Perngner geben schol zwanczig phunt gemainer wienner phennig. vnd der hat er in gancz vnd gar gericht vnd gewert, vnd dar zv^e schol der vorgnant herr der Probst vnd die Samnung ze Herzogenburch dem vorgnanten Perngner alle iar auz ierm chasten ze salapulka an sand Michels tag geben drey mut chorn vnd drey mut habern chasten maiz vncz an des vorgnanten Perngers tot. vnd schol auch er den trayd alle iar ia^erleich nemmen mit seyn wegen, vnd noch des vorgnanten Perngers tot. so sint dy vorgnanten herrn vnd das gotshaus von den vorgenanten seichs mutten vrey vnd ledig. vnd von aller andern erben ansprach, vnd schol auch dan der prief. den der vorgnant Pernger dar v^eber hat von den vorgnanten herren da mit tot sein. vnd nymmer chraft haben. Vnd daz dem vorgnanten herrn dem Probst vnd dem gotshaus daz stet vnd vnczprochen weleib. vnd auch ze ayner sichtigen warn vrchund diser sache geb wier im vnd dem vorgnanten gotshaus. Ich vorgnanter Ortlieb der stereiner. vnd ich Chunrat der puster, disen prief versigelten mit vnsern anhangunden insigeln. vnd wan ich Peter der laycher vnd Ich peter der herbler purger ze drosendorf aygenr insigel nicht enhaben veriehen wier der vorgeschriben sach v^enter der vorgnanten herrn Ortliebs vnd Chunrat des puster insigel dy der vorgeschribn sach mit sampt vns schiedleut gewesen sint. Vnd der sache sint auch gezeug der erber geistleich herr her Wilhalm ze den zeiten Abt ze leruz. vnd der erber byschaiden mann her Wernhart der stereiner. Der prief ist gebn nach christs gepurt dreuzehenhundert iar vnd dar nach in dem zuay vnd fumfczigsten iar des suntagz nach sand lacobs tag in dem snit in dem chloster ze leruz.

Source Fulltext: FAIGL, Herzogenburg (Wien 1886) S. 203-204