Bonifatius episcopus seruus seruorum Dei Dilecto filio, Abbati Monasterii sancte Crucis, Patauiensis dioceses, Salutem et apostolicam benedictionem. Exhibita siquidem nobis nuper pro parte dilecto filio Abbatis et Conuentus Monasterii sancte Marie in Zwetel, Cisterciensis ordinis, Patauiensis, diocesis petitionis series continebat, quod ipsum Monasterium adeo est tam propter debita usuraria, in quibus tenetur et pro quibus maior pars bonorum immobilium ipsius Monasterii eorum creditoribus est impignerata, quam propter usuras huiusmodi, quas de reliquis bonis ipsius Monasterii annuatim soluere habent, pregrauatum et in suis facultatibus diminutum existit et in dies propter mutua, que proinde ac pro eorumdem Abbatis et Conuentus et seruitorum ipsorum sustentatione ac hospitalitatis obseruatione et aliis oneribus eis incumbentibus supportandis necessario contrahere habent, dimminuitur, quod, nisi de oportuno et celeri remedio prouideatur, oportebit eos ipsum Monasterium incultum deserere et mendicare, aut alias aliunde eorum uitam querere, quodque ipsum Monasterium habet in opido Wiennensi eiusque territorio dicte diocesis quandam Grangiam ac certas uineas, que nullam aut modicam ipsi Monasterio afferunt utilitatem, ymo potius interdum incommoditatem, ex quarum pretio, si uendantur, predicta debita, seu eorum maior pars poterunt, ut sperant, solui ac predicta bona impignerata eis magis utilia redimi et recuperari. Quare pro parte ipsorum Abbatis et Conuentus nobis fuit humiliter supplicatum, ut eis huiusmodi Grangiam et uineas ex causa predicta uendendi et perpetuo alienandi licentia concedere de speciali gracia dignaremur. Nos igitur de premissis certam noticiam non habentes, ac ipsorum Abbatis et Conuentus in hac parte supplicationibus inclinati, discretioni tue, de qua in hiis et aliis specialem in domino fiduciam obtinemus, per apostolica scripta committimus et mandamus, quatenus consideratis circumstantiis uniuersis, que circa hec sunt attendende, si tibi uideatur, quod uenditio et alienatio huiusmodi, si fiant, cedant in euidentem utilitatem dicti Monasterii, super quo tuam conscientiam oneramus, eisdem Abbati et Conuentui huiusmodi Grangiam et uineas cum attinentiis ac iuribus et pertinentiis suis imperpetuum ex causa predicta uendendi et alienandi plenam et liberam auctoritate nostra licentiam largiaris, ita tamen, quod pretium exinde prouenturum omnino in solutione debitorum et recuperatione bonorum impigneratorum huiusmodi et alias in utilitatem huiusmodi eiusdem Monasterii conuertatur. Datum Rome apud Sanctum petrum Nonis Aprilis, Pontificatus nostri anno Septimo.

Source Fulltext: WEIS, Heiligenkreuz (=FRA II/16, 1859) S. 390-391