Ich Wolfhart der Cholrer von Gumpoltzchirichen vnd ich Reichmut sein hausurowe Wir uergehen vnd tun chunt allen den, die diesen brief lesent oder ho^erent, die nv lebent vnd hernach chu^enftich sint, Daz wir mit vnser erben gu^eten willen vnd gunst, mit verdachtem mv^et vnd mit gesampter hant, zu der zeit, do wir es wol getu^en mochten, vnd mit Fridreichs hant des Pokchs von Gumpoltzkirichen verchauft haben zway phvnt wienner phenninge geltes Purchrechtes auf vnserm weingarten, der da leit ze Gumpoltzkirichen vnd haizzet der valum ze naehst Jansen weingarten des Grutschan, da man auch alle iar von dem egenanten vnserm weingarten dient in Fridreichs hof des Pokchs zwelif wienner phenning vnd nicht mer; vnd derselbe hof ist auch gruntrecht von den gaestleichen Pru^edern datz dem Teutschen Haus datz der Newenstat. Die vorgenanten zway phvnt wienner phenninge geltes Purchrechtes haben wir recht vnd redleich verchauft vnd geben vmb viertzehen phunt wienner phenninge, der wir gar vnd gaentzleich gewert sein, Dem erbern manne Maister Ortolfen dem artzt von dem Heiligen Chreutz vnd seinen erben Fu^erbaz ledichleichen vnd vreileichen ze haben vnd allen irn frvmen damit ze schaffen, verchauffen‚ versetzen vnd geben, swem si wellen an allen irresal, also mit ausgenomener rede, daz wir oder swer den vorgenanten vnsern weingarten nach vns besitzet in die egenanten zway phunt geltes fu^erbaz alle iar davon dienen suln zu drin zeiten im iar, fu^emf schillinge vnd zehen phenning an sant Michels tage, fv^emf schillinge vnd zehen phenninge ze weihnachten, vnd fu^emf schillinge vnd zehen phenninge an sant Jo^ergen tage mit alle dem nvtz vnd recht, als man ander Purchrecht in dem Lande ze O^esterreich dient, Vnd suln auch wir dieselben zway phunt geltes ablo^esen, swelhes iares wir mv^egen oder wellen, nv^er mit andern zwain phvnden geltes Purchrechtes, die als gut vnd als wol gelegen sein, als auf vorgenanten vnserm weingarten. Vnd zu^e swelhem tage vnd vorbenant ist wir in des Purchrechtes nicht dienen, so sol sich denne des naehsten tages darnach daz selbe Purchrecht mit vnserm guten willen an alles fv^erbot vnd an alle chlage auf dem vorgenanten vnserm weingarten zwispilden ze viertzehen tagen, als versezzens Purchrecht recht ist, in alle dem recht, als ob si es mit vrage vnd mit vrtail vor rechtem gerichte darauf erlangt vnd behabt hieten. Vnd sein auch wir vnd vnser erben vnuerschaidenleich der vorgenanten zwayer phvnt geltes des egenanten Maister Ortolfs des artztes vnd seiner erben, oder swem er si schaft oder geit, recht gewern vnd scherm fu^er alle ansprach, als Purchrechtes recht ist vnd des Landes recht ze O^esterreich. Waer aber, daz in der zwaier phvnt geltes mit recht an den vorgenanten vnserm weingarten icht abgienge, daz suln si haben auf vns vnd auf allem vnserm gu^et, daz wir haben in dem Lande ze Österreich, wir sein lebentich oder tode. Vnd wand wir, noch der vorgenant Fridreich der Pokch nicht eigener Insigil haben, Darvmb so geben wir in disen brief zu^e einem warn vrchunde diser sache versigilt mit des erbern Herren Insigil hern Hainreichs zu^e den zeiten Pharrer ze Gumpoltzchirichen, vnd mit hern Philips Insigil des Schenchen von Gumpoltzchirichen, die diser sache gezeuge sint mit im Insigiln. Diser brief ist geben ze Wienne nach Christes gepurt Dreutzehen Hvndert iar, darnach in dem acht vnd viertzgisten iar an sant Philips vnd sant Jacobs abent.

Source Fulltext: WEIS, Heiligenkreuz (=FRA II/16, 1859) S. 204-206