Ich Dittrich Huetstok, zen zeiten Purchgraue ze Presburch, tvn chunt allen den, di disen prief lesent vnd horent lesen, di nv lebent vnd her nach chvnftich werdent, daz der ersam herre Abpt Ott vom Heiligen chreutz vnd ouch die Samnunge des guetes, des si schuldich waren, zwaihvndert phvnt an acht phvnt vur den erbern man probst Albrecht von presburch, den got genade, derselben phenning habent si mich gar vnd gentzlich gewert vnd verichtet hintz Juden vnd hintz Christen, vnd wa ich sev hin geschaffet han, da habent si mich hin gelediget also, daz si des vorgenanten guetes nichtes niht mer dar schuln weder vil noch wenich. Daz dem also sei, gib ich dem vorgenanten Herren, Abpt Otten vnd der Samnunge vom heiligen chrauz disen prief zeinem vrchunde, versigelt mit meinem Insigel. Der prief ist gebn ze Prespurch, do von Christes gepůrt warn ergangen tausent Iar‚ drev hundert Iar vnd in dem zwainzgistem Iar, an Sand Ovlriches tach.

Source Fulltext: WEIS, Heiligenkreuz (=FRA II/16, 1859) S. 64-65