Ich Alber von Paden tuen ze wizzen an disem prief allen laeuten, di in sehent, lesent oder horent lesen, di nv lebent oder hernach chunftich sint, daz ein chrieg gewesen ist zwischen mir vnd dem apt vnd der samnung dacz dem heiligen Chraeutz umb einen holden, der do haizzet der Waetsch von Paden, vmb daz guet do er auf sizzet, dez ein halb phunt gelts ist; den in mit sampt dem guet mein ân gegeben het ze den zeiten, do si iz wol getvn moht. Daz ward als vergetaidinget vor meinem hern, dem herczogen Fridreich, daz wir vns sein paidenthalben sazten an ersam laevt; daz waren meinethalben mein Sweher, her Weigant der eisenbaeutel vnd her Vlreich vor den minnern pruedern ze wienn, vnd des aptes vnd der Samnvnge halb her Chalhoch von Eberstorf, der ze den zeiten Chamerer was ze Osterreich, vnd her Chvnrat von Praitenvaelde. Di beschiden iz also, daz dem apt vnd der samnung der vorgenant holde vnd daz guet beleiben scholl mit aller rue vnd ich mich angenomen han scherm für alle ansprach, vnd doch gerleich für mazzen, meine pasen, vnd für ander mein freund nah des Landes reht. Vnd darumb ze einem warzeichen sv^oenes vnd vrides vnd diser ebenung, vnd ouch vmb daz widermv^oet, daz mir widervarn was von des waetschen prueder, daz ouch daz ein ende hab, so han ich von dem apt vnd der samnunge emphangen zehen phunt phenning. Vnd daz dise red vnd dises geschefft stet beleib vnd vnuerwandelt, dar vber gieb ich Alber von Paden disen prief ze einem sichtigen vrchunde diser sache, versigelten mit meinem Insigel, vnd benenne daran di gezevge, di dabei gewesen sint vnd mit der wizzen iz geschehen ist. Das sint die vorgenanten vier schiedmann, her Albrecht der vorstmaister, der ersam Ritter der hvtter, her Chv^enrat der huebmaister vnd sein svn der Chv^enrat, her Greiffe avf der Steten vnd sein svn her Greiff von als, her Johanns der mvnzmaister, her ulrich der weinel, her heinrich des vorsprechen svn vnd ander levt ein michel teil.Diser brief ist geschriben vnd gegeben, do nach Christes gepurt ergangen waren tousent iar, dreuhundert iar vnd dar nah in dem ahtadem iar, vor sant Merteins tag vier tag.

Source Fulltext: WEIS, Heiligenkreuz (=FRA II/16, 1859) S. 24-25