Fridericus dei gratia Romanorum imperator semper augustus Jerusalem et Sicilie rex. Per presens scriptum notum fieri uolumus vniuersis imperii fidelibus tam presentibus quam futuris, quod venerabilis abbas et conuentus monasterii sancte crucis in Austria fideles nostri celsitudini nostre humiliter supplicarint, quod, cum ex concessione quondam ducum Austrie, qui ipsum monasterium fundauerunt, propria uictualia domorum suarum uidelicet annonam, uinum, caseos, sales, pisces, oleum et pecudes, ad usus suos tantum sine teloneis, uectigalibus et aliis exactionibus tam in terris quam in aquis libere ducere consueuerint, nos eis libertatem ipsam concedere de nostra gratia dignaremur. Nos igitur, qui religiosas personas et loca deo dicata digno fauore prosequimur, eorum supplicationibus inclinati libertatem ipsam eis de gratia nostra concedimus, prout ex concessione dictorum ducum et eorum temporibus soliti sunt habere, secundum quod etiam in priuilegio nostro dicto monasterio a nobis indulto, bulla aurea impressa tipario nostri culminis insignito, plenius continetur. Quare mandamus et precipimus fidelitati uestre, quatinus nullus sit, qui dictum abbatem et conuentum monasterii sancte crucis in Austria fideles nostros super hiis ausu temerario contra predicti priuilegii et presentis scripti tenorem offendere uel impedire presumat, sicut penam priuilegio ipso appositam et indignationem nostram desiderat euitare. Ad huius itaque concessionis nostre memoriam et stabilem firmitatem presens scriptum fieri, et sigillo nostro iussimus insigniri. Datum aput Wiennam anno dominice incarnationis Millesimo ducentesimo tricesimo septimo, mense Februarii, decime indictionis.

Source Fulltext: WEIS, Heiligenkreuz (=FRA II/11, 1856) S. 97-98