Ich Pilgreim der Siczenda^erffer vergich offenleich an dem prief mit sampte alle mein erben und tu^en chunte allen den, die yn sehent oder ho^erent lesen, die nu lebent und hernach chunftige sint, daz ich mit wol verdochtem muet und mit gunste und mit guetem willen aller meiner erben und mit rat meiner pesten vreunt zu der zeit, do ich iz wol getu^en machte, verchaufte han meins rechten aygens auf uberlent, echern und auf weingarten datze Siczenda^erf und datze Gokkenda^erf und datze Oberngrabarn und ze Prawnhartz^eperge und ze Grozze an sechs phenninge zwai phunt phenninge gelt^ez den erbern herren hern Niclasen dem phfarrer von Ra^erbach,¹ hern Dietreichen von Scho^enngrabarn,² hern Niclasen von Holebrunne,³ hern Symon von Ruspach, hern Dietreichen dem chapplan datze sande Stephan⁴ auf dem Wagrayn zu den zelten chamerer, hern Merten des von Winchel chapplan, hern Vlreichen dem phfarrer ze Rietental, hern Alramen dem phfarrer ze Redeprunne, hern Chv^enraten dem phfarrer ze Trebnse,⁵ hern Stephan dem phfarrer ze Grozze, dem erbern herren hern Hadmarn dem Svn^enberger und dem erbern ritter hern Lebm von Grafenwerde und Vlreichen dem Velibrunner und Niclasen dem Redeprunner und wen seu hynfuer yn i^er pruederschafte nement, swie so der genant ist, umbe zwainczke phunt phenninge Wienner munizze, der seu mich und mein erben gancze und gare gewert habent zu rechten tagen an allen schaden. Und derselben gulte dient man an sande Michelstage an echt phenninge aynlef schillinge und an unser vrawn ta^eg zu der liechtmesse an zwen vierczke phenninge fuer zehenthalbe huen und an sande Jeorgentage an sechs phenninge ein halb phunt phenninge. Wier haben yn auch dieselben gulte geben mit alle dem rechten und mit alle den nuczen, und wier die yn rechter aygens gewer herprocht haben unversprochhenleichen, versuecht und unversuecht, swie so daz genant ist und schullen seu auch und i^er nochcho^emen dieselben gulte hynfuer ledichleichen und vreyleich^e in nucze und gewer ynnehaben verchauffen verseczen geben, wem seu wellent und allen ir^en fru^em domit schaffen an allen ierr^esal. Und da^erzu durich gueter sichherhait willen secze ich egenanter Pilgreim der Siczenda^erffer zusampte mier und mein erben mein prueder Pauln und Otten und Niclasen die Si^eczenda^erffer und i^er erben den va^ergenanten erbern herren und ir^en nochcho^emen oder wen seu hynfuer yn i^er pruederschafte nement, der ofte genanten gulte zu rechten gewer^en und scherme fuer alleu ansproch, als aygens recht ist in dem lande ze o^esterreich. Wer aber, daz seu chryege oder ansproch da^eran gewunnen, von wem daz wer, des seu mit recht schaden nemen, denselben schaden, den seu pei i^ern trewn gesprechhen mu^egen, den schullen wier yn gancze und gare abtragen und auzrichten an allen ir^en schaden. Daz loben wier yn als ze laisten und stet zu behalten mit unsern trewn an allez gever und schullen seu iz darezu^e haben auf uns egenanten Siczendarffern unverschaidenleichn und auf allem unserm guet, daz wier haben oder hynder uns lazzen in dem lande de o^esterreich und schullen sein auch dovon becho^emen mit unserm guetleichen willen an alleu widerrede, wier sein lebentige oder tode. Und daz die rede hynfuer also stet und untzebrochhen beleibe, daruber so geben wier yn den prief zu einer warn urchunde der sachhe versigelten mit unsern anhangunden insigeln. Der sachhe und der rede ist auch zeuge unser veter Alber der Chyrichperger und Vlreich der Gokkenda^erffer mit ir^en anhangunden insigeln an dem gegenwuertigen prief. Der prief ist geben nach Chrystes gepuerde über dreuczehen hundert jare da^ernach in dem vier und funftz^ekysten jare an sande Mertentage.

Source Fulltext: FUCHS, Göttweig I (=FRA II/51, Wien 1901) S. 481-483