Wir Maximilian, von gots genaden rómischer kúnig, zu allenntzeiten merer des reichs, zu Hungern, Dalmacien, Croacien etc. kunig, ertzhertzog zú Osterreich, hertzog zu Burgundi, zu Brabannt, zu Gheldern etc., grave zú Flanndern, zú Tirol etc., bekennen, als unnser stat Zwetl durch die yetzbeschehen prunnsst in mercklich abnemen und verderben kómen und deshalben vasst ód und pawfellig worden ist, und wo wir mit unnserr hilff nicht darein sehen, ganntz vergénngklich werden mócht, daz wir solhs zu verhúetten unnsern getrewen lieben .. dem richter, rate und unnsern burgern gemainclich zu Zwettl die sonnder genad getan und in die drewhundert phúnt phening bestanndgellt, so sy unns von unnsern émbtern und schatzstewr daselbs iérlichen zú raichen schuldig sein, zú hilff desselben paws der berurten unnser stat auf zway iar, die négsten nach datum dits unnsers briefs nacheinannder volgennd, und darnach bis auf unnser widerrúffen und wolgevallen zú gebrauchen gegeben und vergónnt haben wissenntlich mit dem brief, also, daz sy solh gellt zú paw der vorberúrten unnser stat, wo das ain notdúrfftigisten ist, anlegen und unnserm getrewen lieben Sigmunden Snaittpekhen, unnserm vitzthúmb in Osterreich únnder der Enns, die zwayhundert phúnt phening, so unns aus den vorbestimbten drewhundert phunt pheningen von den obgemelten unnsern embtern iérlichen gefallen, wie sy dieselben ausgeben und anlegen, aigenntlichen aufschreiben und antzaigen, damit wir múgen wissen haben, das solh gellt wol und nútzlich angelegt werde ungeverlich. Mit urkund dits briefs, geben am Sambstag nach sannd Margrethen tag nach Cristi geburde im fúnffczehennhúndertisten, unnser reiche des rómischen im fúnffzehennden und des húngerischen im aindleften iarenn.||
||
(auf der Plica) Commissio domini regis in consilio.||
(unter der Plica) Rottal||
Florian Waldauf v. Waldenstain||
Oswalt Héring buchhalter m(anu) p(ro)p(ri)a