Wir, Albrecht, von gotes gnaden herczog ze Oͤsterreich, ze Steir, ze Keͣrnden und ze Krain, Graf ze Tirol etc. Bekennen: Wan uns unser getrewn lieben, der N. Richteͣr, N. Rat, N. die Burgeͣr und die gancz Gemain baider Stet zu Krems und zu Stain angeruͤfft und gepeten habent, In soͤlich genad zu tuͤn, daz Si under In in yegleicher derselben Stet Jeͣrleich einen Burgermaister gewelen und gehaben moͤchten, als in andern unsers Lands zu Oͤsterreich Steten sit und gewonhait sey, haben wir angesehen Iͤr vleissige pete und haben darumb und durch gemains nuczs willen, der daraus bekoͤme, als uns ist fuͤrgelegt, den egenanten Burgeͣrn die genad getan und tuͤn auch wissentleich mit dem brief, daz Si nu fuͤrbasser in yegleicher derselben Steten Jeͣrleich einn Burgermaister, die nucz und guͤt darczuͦ sein und die unsern und der egenanten Stet nucz und frumen ainhellikleich fuͤr sich nemen und treiben, an geveͣr under In welen und haben muͤgen, die uns swern und huldigen, als in andern unsern Steten gewonhait ist, doch uncz an unser widerruͤffen ungeveͣrleich. Und des zu urkunt geben wir In disen brief mit unserm angehangen Insigl besigelt. Der geben ist zu Wyenn an Mittichen vor dem Palmtag Nach kristi gepuͤrd vierczehenhundert Jar, darnach in dem sechczehenden Jar.

Source Fulltext: Stadtarchiv Krems, 2019.