Ich Hainreich der Ouen vergich vnd tuen ehvnt allen leuten di den prief sehent lesent oder lesen ho^erent, daz mein gnedigew vraw Margret di ernwirdig Abbtessinn des gotzhausz ze Traunchirichen mir vnd meiner hausfrawen vnser paider erben in allen den rechten vnd ander ires gotshausz eribrecht recht habent, hat verlihen ze rechtem eribrecht drew gueter gelegen datz Varstarn in Lohchiricher pharr mit allen den nutzen vnd rechten di dar zu^e geho^erent ze holtz vnd ze veld, besuecht vnd vnbesuecht jn so^eliher maynung, daz ich mein hawsfraw vnser paider erben gern vnd willichleich allz daz dulten su^ellen vnd auch wellen, daz andere irs gotshausz eribrecht dultent vnd leident, vnd su^ellen wir ich vnd mein erben ierleich all iar an vnsrer vrawen tag ze der dienst zeit dienen vnd geben von dem ainen dritthalben metzen chorns fu^enftzehen metzen habern zway huener sechs pfenning fu^er ein lamp an sand Jo^ergen tag, vnd von disen zwain fu^enftzigch newer wienner pfenning, von isleichem fu^enf vnd zwaintzikch pfenning oder alter pfenning wienner mv^enzz di dafu^er pueren, auch ierleich an dem selben vnsrer vrawen tag vnd von isleichen auch zway huener vnd stewer nach gnaden von den guetern allen drin. Waer auer daz ich vnd mein hausvraw vnser paider erben der vorgenanten vodrung aller nicht geben zu dem (sic) benanten têgen oder darnach inner den negsten viertzehen tagen meiner obgenanten vrawen oder irem gotshaus, so schol si vns vnd auch ir nachchomen darvmb no^etten vnd pfenten vnd vmb sechtzikch pfenning darzu^e, der sei wir in veruallen ze wandel nach lantzrecht. Wer auch daz getan, daz wir ich mein hausfraw oder vnser erben dasselb nicht leiden wolten vnd daz indert v^eberfu^eren in dhainen wegen alz vor an dem brief stet geschriben, so schu^ellen di êgenanten gueter alle drev meiner obgenanten vrawen Margreten vnd irs gotshausz ledigs vnd veruallens guet also sein, daz wir fu^erbaz darnach dhainerlay zueversicht noch ansprach nicht mer haben su^ollen noch mu^egen. Vnd darv^eber zu einem vrchv^end der worhait vnd zu einer pezzern sichherhait gib ich oftgenanter Hainreich Ouen den prief meiner vorgenanten vrawen Margreten der Abbtessinn vnd irem gotshaus fu^er mich vnd fu^er all mein erben versigelt mit meiner lieben frevnt anhangunden jnsigel Symon des Obernhaimer vnd Stephans des Teufenpekchen, darvnder ich mich verpint allez des stet zehaben mit meinen trewen, daz vor an dem prief stet geschriben wand ich selb noch nicht aygens jnsigels han. Der brief ist geben nach Christz gepu^erd drewtzehenhundert iar vnd im syben vnd fv^enftzigisten iar an dem pfintztag in den oster veyertagen.

Source Fulltext: OÖUB 7 (Wien 1876) S. 497f., Nr. 491