Wir Elspet von gotz gnaden Aptessin ze Traunchirchen vnd der Conuent des selben Gotzhaus veriehen offenleich mit disem brief allen den, die in ansehent, ho^erent oder lesent, Daz zv vns chomen ist Ludweich von Aych vnt hat versatzt ze einem rechten satze mit willen vnt wort seiner hausvrawen vravn Margreten vnt aller ier erbem seinem Pru^eder wernharten von Medelnpach vnd seiner Havsvrawen vravn Anglesen vnd iern paiden erben allen den eribtail, den er hat auf der Mv^el datz Aych, di rechtes Erib ist von dem Gotzhavs vnd den Eribtail, den er hat auf der halben Hu^eb datz Medelnpach, di rechtes lehen ist von dem Gotshaus vnd von vns, deu in von vater vnd von Mu^eter an geuallen ist, fu^er Siben Pfunt wienner phenning mit alle dev vnd zv den vorgenanten gu^eten geho^ert, ze holtz vnd ze velde, versu^echt vnd vnuersu^echt, mit allen nu^etzen also beschaidenleich, daz der vorgnant Ludweich, sein hausvraw vnt ier Eriben alle jar jerleich habent vollen gewalt ze lo^esen and sand jeorigen tag vnt nicht ê vnt sweliches jares vnt si lo^esent, so schol der vorgnant wernhart, sein hausvraw vnt sein erben allen den nutz ab nemen ab der vor genanten halben hu^eb vnt ab der Mu^el vntz nach dem snit, den si dar auf gepawen habent. Dar v^eber geben wir in disen offen brief ze ainem sichtigen vrchund versigelt mit vnsern paiden anhangvnten jnsigeln. Der brief ist geben, da man zalt nach Christes gepu^erd dreutzehenhvndert jar, dar nach in dem zwai vnd dreizzigistem jar des nagsten Phintztages nach sand Margareten tag.

Source Fulltext: OÖUB 6 (Wien 1972) S. 68, Nr. 59