Qvoniam labescentibus temporibus simul cvm ipsis labitur memoria hominum, necesse est, ut scripto conmendentur, que in recordatione digne haberi debentur. Ea propter ego Amerlo hospitalis in Pirn tam presentibus quam futuris per presentem paginam notifico, quod dominus Livtoldus de Pernowe et uxor sua prebendam unam consensu fratrum domus apud nos impetrauerunt, pro qua prebenda L talenta antique monete dederunt. Qui ut saluti animarum suarum melius prouiderent, annuatim sex scaphia frumenti et sex auene de mensura in Anaso et duos porcos in usum comunis prebende dare promiserunt. Insuper predium vnum in Ellinge reddens annuatim tres solidos ecclesie isti contulerunt. Qualis autem ipsa prebenda cottidie esse debeat, ne minus detur uel magis ab ipsis exigatur, in presenti scripto exprimimus. Quolibet die quatuor panes. Si vero sacerdotibus in domo albus panis detur, duo albi et duo siguli ipsis dentur. Qualitas ferculorum, uelut ipsi magistro hospitalis ipsis administretur, siue ipso hospitalensi absente velut duobus sacerdotibus ipsis fercula impendantur. Si vero tanta penuria eueniat, ut domui annona in pane non sufficiat, per ebdomadam mensuram vnam tritici, que dicitur gorl, ipsis tantum vsque ad nouam messem damus. Quando domus tres carradas uini habuerit, de meliori post primum uas dimidiam carradam ad annum ipsis dare promisimus, ni forte tantus defectus uini fuerit, de dimidia carrada statuta secundum quod conueniens uidetur, remittant. Quod si forte mutata uoluntate ab hospitali sponte recesserunt, de omnibus, que dederint, nullam habeant possibilitatem repetendi, nec etiam ipsis absentibus prebenda interea detur, nisi denuo redierint, prebenda predicta ut prius sine contradictione ipsis persoluatur. Si unus u ...... cesserit, taliter ordinauimus. Si dominus Livtoldus prior obierit, vxori sue dimidietas prebende Statute in cibo et potu amministretur. Si autem ipsa prius decesserit, dominus L. mensam hospitalis accedat et ueluti vni sacerdotum in omnibus sibi prouideatur et seruus unus sibi pascatur. Nos vero huiusmodi conuentionem ecclesie vtilem esse deliberauimus, maxime cum ipse dominus L. firmiter promiserit, vt sine omni dampno domus nobiscum stare uelit et ecclesie profectum et vtilitatem in omnibus uelit promouere. Et ut nichil dubietatis in predictis ualeat reperiri de frumento et de porcis annuatim persoluendo, sic definitum est. Post mortem domini Livtoldi uxor sua frumentum et porcos non soluat, sed si ipse superuixerit, quamdiu per se familiam et domum habuerit, sex scaphia et porcum vnum soluat, donec comunem vitam fratrum eligere uoluerit, vt in mensa hospitalarii, ut predictum est reficiatur, tunc amodo non soluat. Acta sunt hec anno incarnationis domini M. CC. XLI. domino Amerlone hospitalario sub hiis testibus dominus Volmarus sacerdos, Heinricus sacerdos, magister Chunradus de Lambach, dominus Albertus cappellarius domini episcopi babenbergensis, Heinricus Vlaeminc, frater Chunradus Clauiger, frater Perhtoldus, frater Fridericus, frater Heinricus de Wilbach, Pilgrimus de Chirchdorf, officialis ecclesie Heinricus Chrivchaer et alii quam plures.

Source Fulltext: OÖUB 3 (Wien 1862) S. 107-108, Nr. 102