Wir Ludweig von gotes genadn Romischer Chayser ze allen zeitn merer des reichs tuen chund offenleich mit disem brief, daz wir durch gunst vnd von wesundern genaden den geistleichen mannen dem abbt vnd dem conuent ze Mannsee vnsern lieben diemutigen westa^ett haben vnd westattn auch mit disem gegenwurtigen brief alle die brief, hantfest, freihait, gewonhait vnd genad, di sy von vnsern vettern hainreichen, otten vnd hainreichen herczogen ze Beyern seligen oder von andern irer herschaft ze Beyern habent vnd wellen nicht, daz jn dieselbn recht und freihait chain vnser amptman noch nieman anders vberuare mit chainen sachen bey vnsern hulden, mit vrkund diss briefs, den wir in gebn haben versigilt mit vnserm chaiserlichem Insigel an dem nachsten Sunntag nach sand Andres tag, do man zalt von christi gepurd drewzehen hundert Jar, darnach in dem ain vnd vierzigstem Jar, in dem Acht vnd zweinzkistem Jar vnsers Reichs vnd in dem Vierzehenden des Chaisertums.

Source Fulltext: OÖUB 6 (Wien 1872) Nr. 394, S. 397f.