Ich Christan der Chu^erczz von Mundolfing vnd alle mein Eriben veriehen offenbar an disem brief allen den, die in sehent oder ho^ernt lesen, daz wir auf dem hof, der da leyt ze Mundolfing, den wir von vnserm lieben herren dem abbt vnd der Sammung ze Ma^ennse ze pawmansrecht jnne haben, chain recht, daz erbrecht ist genant, ziehen noch haben, dann daz wir jn ze pawmansrecht von in haben vmb den dienst, der davon geho^ert, wir sullen auch iarleich ze rechter Stiftezeit in ir Stift chomen vnd jn ir Stift geben vnd in aufgeben den vor genanten hof vnd in wider von in raihen, di weil sy vns dez gunnen, alz pawmansrecht ist. war aber daz, daz wir jn (de) hainen chrieg vnserm genadigen herren dem abbt oder dem gotshaws an den oben geschriben sachen vnd rechten auf ta^eten oder pru^eften, wy dem wa^er, dez sy schaden na^emen, denselben schaden sullen wir jn abtu^en an alz recht vnd alle widerred, vnd darüber ze einem waren Vrkund gib ich Christan der Chu^erczz fu^er mich vnd fu^er all mein Erben disen brief wehangen mit meinem insigel. datum Anno domini Millesimo Trecentesimo Quadragesimo jn die conuersionis sancti pauli.

Source Fulltext: OÖUB 6 (Wien 1872) Nr. 310, S. 314