ICH Nycla von Cho^etway purger datz Stayn vnd ich Clara sein hausvrow vnd alle vnser erben wier veriechen offenbar an dem prief vnd tv^en chunt alle den, di in sechent oder horent lesen, daz wier mit wol verdachtem mv^et recht vnd redleichen ze cha^euffen geben haben dem wierdigem geistlichem herren abpt Hainrichen ze Glench vnd seinem conuent vnd alle iren nachchomen vberal do selben cehen phenning pu^erchrechtes vmb ier beraytschafft, der wier gantz vnd gar gewert sein vnd di si vns alle jar gedient habent an sand Michels tag in půrchrechtz gewer van irem weingarten, der do leit vnter dem obern Lintperch bei dem mullgaezzlein vnd haist auch dez Olbm secz. Wier luben auch jn di selben cehen phening pu^erchrechtes auf dem egenantem weingartem schermb vnd fu^erantbůrtenn, als pu^erchrechtz recht ist vnd auch dez lantes sit in O^esterrich. Vnd daz lub wier jn allez staet zehaben mit vnsern trewen vnd darvmb zv^e einer gv^eten sicherhait geb wier jn den prief mit vnserm jnsigel zv^e einem v^erchunt der sach. Wier haben auch gepeten den erbern man hern Hainrich den Chrautbu^ermb zv^e den zeiten sluzzler datz Chrems, daz der jn auch sein jnsigel zv^e sambpt vnserm jnsigel zv^e einem zeug jem selben an schaden gelegt hat der sach (sic). Der prief ist geben nach Christes gepu^ert drevtzehen hundert jar vnd in dem fumf vnd funftzkistem jar dez suntages nach a^estern vocem jucundidatis.

Source Fulltext: OÖUB 7 (Wien 1876) S. 413, Nr. 401