ICH Peter von Ritzenwinchel vergich offenwar an disem brief vnd tu^en chunt allen den, die in sehent, lesent oder lesen ho^erent, div nv lebent oder hernach chunftig werdent, daz ich mit wolbedachtem muet vnd mit guetlichem willen meiner hausfrown Elspeten vnd aller meiner eriben, nach rat meiner frevnt zter tzeit, do ichs wol getu^en macht, meins rechten lehens tzwo hueb datz O^ed gelegen in Tuedeher pfarr mit allen den nutzen, vnd dartzv^e geho^ert ze holtz, ze veld, versu^echt vnd vnuersucht, wie ez benant sei, ze chauffen geben han den eribern vnd gaeistleichen laevten appt Hainrichen vnd der sammung datz Glevnch vmb siben vnd sechtzik pfunt pfenning wienner mu^enzz, der ich gantz vnd gar von in gericht vnd gewert pin also, daz siv div vorgenanten gueter hinfu^er vnd ewichleich innehaben schu^ellen vnd besitzen in rechter aigens gwer nach den rechten, div daz vorgenant gotshaus hat von den eribern vnd edeln hern von Volkchenstorf, von den ich die vorgeschriben guet zu lehen gehabt han. Vnd pin auch ich vorgenanter Peter von Ritzenwinchel derselben gueter dez egenanten gotshaus gwer vnd scherm nach lants recht fur alliv ansprach an aller stat, wo in dez nat geschicht, vnd waz in daran abgieng oder welhen schaden siv daran naemen von meinen eriben, den schu^ellen siv haben auf aller der hab, div ich han in dem lande. Daz in daz staet hinfur vnd vnzebrochen beleib, darv^eber gib ich vorgenanter Peter Ritzenwinchler disen gegenwürtigen offen prief versigelten mit meinem aigen anhangundem jnsigel vnd bestaett den mit dez erbern herren hern Albrechts von Atzenbrukk insigel zten tzeiten purkrafen ze Steyr vnd mit meins o^eheims jnsigel Ottens dez Hinderholtzer. Der gegeben ist, da von Christes gebu^erd warn ergangen drivtzehen hundert iar, darnach in dem funftzigistem iar an sand Cholmans tag.

Source Fulltext: OÖUB 7 (Wien 1876) S. 203f., Nr. 203