Ich Friderich der Chersperger richter ze Steir vnd alle mein erben, wi di genant sint, die nv lebent oder hernach chu^enftich werdent, vergehen vnd tůn chunt allen den, die den brief an sehent oder ho^erent lesen, daz wir mit veraintem můt wol bedacht vnd mit gu^etleichem willen nach rat vnserr pesten friunt zu der zeit, do wir ez wol getůn mochten, durch vnserr sel willen geschaft haben den herren vnd dem goczhaůs ze Gleůnch in di oblay vnsern weingarten gelegen ze Straczing an dem Oloch, do man fu^enzehen winner phenning ze purchrecht von gibt, mit allen den nu^etzen vnd rechten, di dar zu geho^erent, swi di genant sint, besucht vnd vnbesucht, also daz si vns vnd vnsern vodern vnsern iartach alle iar mit vigili vnd messe an dem ahten tag vor sant Mirteins tach begen su^ellen; wer auch, daz chainer vnserr irben nach dem genanten weingarten spraech oder in haben wolt, der sol dem genanten goczhaůs ze Gleůnch geben viertzich phunt phenning wienner munzze; swann auch ich obgenanter Friderich Chersperger alain nimer enpin, so sol der ob genant weingart, wi man in dann fint, an allen chriech vnd widerred des obgenanten gotzhausse ze Gleunch ewichleich sein. Daz daz also staet vnd vnzerbrochen behalten werd, gib ich obgenantev Fridereich Chersperger fu^er mich vnd alle mein erben den brief versigelten mit meim vnd der stat ze Steir anhangenden Insigeln vnd ist geschehen, do man zalt von Christes geburtt drewzehenhundert iar vnd dar nach in dem nev^on vnd viertzichistem jar an sant Mirteins abent.

Source Fulltext: OÖUB 7 (Wien 1876) S. 148f., Nr. 149