ICh Ott der pvchs vergich vnd tuen chvnt allen den, die disen prief lesend oder horent lesen, die nu lebent oder her nach chvnftinch werent, Daz ich mit verdachtem muet vnd mit meiner Erben gvnst vnd willen ze der zeit, do ich iz wol getuen mochte, ||
aufgegeben han Meiner mueter vraw Diemueten der pvchsin vor vnserm pergemaister ze den zeiten hern Chvenrates des Nvzdorfer daz halbe gevch leit an der weizzen leiten ze nachst dem gevder, Da man von dient alle iar ze Rechtem perchrecht fumf viertail weins vnd drey helbling ze voit Recht vnd nimer vnd schol di vorgenant vrow Diemuet mein mueter mit dem vorgenanten weingarten Schaffen allen ieren frum ze versetzen vnd verchovffen vnd geben durich got oder wen si wil, an allen irresal vnd han auch ich vorgenanter Otte mich verzigen vnd avf gegeben alles daz Recht, daz ich an dem vorgenanten weingarten haben scholt. wer aver daz getan, daz di vorgenant vrow Diemuet mein mueter verfuer vnd sturbe an geschaeft vnd ich den vorgenanten weingarten in ierer gwalt fvnde vnverchvmbert, So schol er wider erben avf mich den vorgenanten Otten oder avf mein nachsten Erben. Daz di sach, die hie vorgeschriben ist, staet vnd vnzeprochen peleibe, Dor vber so gib ich der vorgenant Otte meiner Mveter vrow Diemueten der pvchsin Disen prief zv einem sichtigen vrhvnt vnd zv einer ebigen pestaetigvn diser sache versigelten mit meinem insigel vnd mit meines perge Maisters insigel hern Chuenrates des Nvzdorfer, der diser sach gezevg ist mit seinem jnsigel, wan di wandlung vor iem geschehen ist. Diser sach sind gezevg jans von Nvzdorf, her Dverinch von Seveld, Hainreich der grintzingoer, Hierz an dem Nevsidel, Otte der weydvngawer, vnd der potzla vnd ander piderbe levt genuech, den die sach wol chvnt ist. Der prief ist geben nach Christ gepuerd Drevtzehen hundert iar, in dem fumf vnd zwaintzigistem iar ocht tag nach dem percht tag.

Source Fulltext: OÖUB 5 (Wien 1868) S. 415-416, Nr. 417