Reuerendo in Christo Patri Domino Vlrico Abbati Ecclesiae in Glunickh eiusdemque loci Collegio A, miseratione diuina Abbas Ecclesiae in CrembsMünster totumque Capitulum eiusdem loci cum deuotis Orationibus gratiam in praesenti et gloriam in futuro. Societatem seu feodus Specialis Fraternitatis inter Ecclesiam nostram et vestram, quod uestrae deuotioni petere placuit, in perpetuum vnanimi omnium cum consensu tenere decreuimus in hunc modum, vt, cum aliquem ex nobis siue ex vobis de hac vita migrare contigerit, alterna vicissitudine pulsatis ex more campanis in missis, vigilijs et alijs pijs operibus quibuscumque ipsius Spiritus plasmatori omnium commendetur. Ipso uero die quilibet Sacerdotum ad unam missam, deinceps ad tria et totidem corporalibus disciplinis se ligabit necnon inferiorum Ordinum Fratres ad vnum psalterium et tres similiter disciplinas et conuersi ad centum quinquaginta Pater noster et (cum) totidem salutationibus angelicis tribusque disciplinis (sic) nunc et imposterum fideliter persoluenda, Caeterum si aliquem Fratrum Glunicensium cum litteris sui praelati ad nos uenire contigerit siue per commansionem vnius Atini vel amplius siue causa deductionis solatij, in ornnibus et ab omnibus ipsi vtpote vni ex nostris solatia mutua praebebuntur, Placuit autem huic pacto talem inserere conditionerm, vt singulis annis proxima vacante feria post festum Sancti Michaelis Archangeli pro defunetis Fratribus nostris apud uos et vestris apud nos fiat sollemniter officium defunctorum eoque die ad vnam Missam et disciplinam corporalem Sacerdotes et inferiorum Ordinum Fratres ad quinquaginta et conuersi ad centum Pater noster et totidem salutationes Angelicas cum disciplinis corporalibus tenebuntur. Ne igitur abusus obliuionis tam religiosae opus absorbeat pietatis, praesentem litteram conscribi fecimus et Sigillorum nostrorum appensionibus communiri. Datum et Actum in CrembsMünster Anno Dominicae Incarnationis millesimo Trecentesimo decimo tertio in festo Santi Michaelis Archangeli.

Source Fulltext: OÖUB 5 (Wien 1868) S. 114, Nr. 113