Nos Heinricus dei gratia Palatinus Comes Renj, Dux Bawarie omnibus presentia inspecturis inperpetuum. Consideracionem internam habentes perpendimus, quod debitores diuine clementie existimus, que nos in Principatus locauit solium et fecit temporalibus habundare, ut pro reconpensacione saltem aliquali collatorum beneficiorum indempnitatibus prouideamus Ecclesiarum et profectibus consulamus. Sane inuitati honestate ac hospitalitate Glvnicensis Ecclesie, quam non magnis adiuta redditibus exhibet (sic), maxime per prouidentiam dilecti nobis Chvnradi nunc abbatis ibidem eam in nostre defensionis et tuitionis, quemadmodum antecessores nostri fecerunt, recipimus gratiam specialem volentes, eandem Ecclesiam omnibus iuribus suis ac libertatibus habitis et obtentis per jllustrem Principem pie memorie Leupoldum Ducem Austrie nec non Fridericum filium eius et alios gaudere pacifice et quiete siue priuilegia sint, que obtinet de libertate aduocacionis siue judicij prediorum et hominum, tam prius habitis quam modo in Haedershoven vel alibi obtentis, nec non ut victualia sua per terras possint ducere sine exactione cuiuslibet Thelonej siue Mute ac etiam, quod tam proprietates quam feoda possint recipere sibi ob remedia tradita animarum. Premissa et similia, sicut obtinuerunt rationabiliter a prefatis Principibus, ita ea approbamus et ratificamus nolentes, dictam Ecclesiam iuris sui pati aliquod dispendium, sed ea potirj per omnia inconuulse. Ut igitur omnia premissa et singula premissorum prefate Ecclesie rata et firma permaneant nec in iuribus suis aliquis judicum vel officialium nostrorum audeat nouercarj, presens instrumentum dicte Ecclesie tradimus nostri sigillj robore conmunitum. Datum in Steier Anno domini Millesimo Ducentesimo Septuagesimo septimo, Octavo jdus Januarij.

Source Fulltext: OÖUB 3 (Wien 1862) S. 457-458, Nr. 495