Ich Diemut heinriches witib van Moln vnd wir baid bruder Heinrich vnd Ruger ir svn vnd alle vnser erben vergehen vnd tvn chvnt an disem prief allen den, di in lesent, sehent oder hoerent, di nv lebent vnd nach chumftich sint, Daz wir mit verdahtem mvt vnd mit gutlichem willen aller vnser erben vnd vrevnt haben verchauft Thomam vnserm vrevnt sehs gu^et, di da ligent in der pharr ze Moln, vmb ains vnd Sibenzich phunt phunt (sic) phenning wienner mvnz vnd sein der selben phenning schon vnd redlichen gewert . derselben gu^et haizzent drev am aschach in der garnweid vnd ligent di andern drev im o^ebleinstal, mit alle dem reht vnd wir vnd vnser vor vodern haben gehabt van den fursten van Osterich, vnd hab wir daz vorgenant gu^et auz anderm vnserm gu^et geschaiden vnd genomen vnd luben auch Thomam vnd allen den, den er daz vorgenant gu^et geit oder maht, daz wir vnd vnser vrevnt vnd vnser erben gewern sein vnd suln iz scherm vor aller ansprach. Daz di sach also stete vnd vnzerbrochen beleib van vns vnd van vnsern erben, swi si sein genant, geb wir disen prif ze vrchunde versigelt mit der erbern Herren insigel Hern Heinrichs vnd Hern Marchartz der prevhefen, Otten des schechen vnd mit Peter ponhalm insigel, wand wir niht aigner insigel haben; da van hab wir di sach bestetigt mit der vorgenanten Herren jnsigel vnd sint des zevge Ditrich van volchenstorf, Ernst van lobmich, Ott hurnbech, wulfinch, Ott chersperger, Ott Grevl, Heinrich muhler, Heinrich, chunrat, jans bruder, Heinrich lipker, Heinrich enser, peter, Stephan des aptes diener ze Gersten, vnd ist daz geschehen, da nach christes geburde ergangen warn drevzehen hundert jar vnd darnach in dem Nevnzehenten jar an Sant Aiten Tag.

Source Fulltext: OÖUB 5 (Wien 1868) S. 237-238, Nr. 243