Ich Almar gehaizzen von Speissendorf tvn chunt allen den di disen prief horent oder lesent, daz ich mit gvtem willen meins selbs vnd meiner liebn haus vrowen vron Margreten vnd meiner chind Albers meins sunes vnd meiner tohter Margreten, Chlaren, Katrein, Jevten vnd Annen han verchauffet zwai lehen dacz Newpavch, die dient siben schilling fvr rechtez aygen, alz is mich vnd mein vorgenant havsvrowen von vnsern vodern an ist chomen mit allem recht der erweren vrowen vron Offmein der Aptessinn vnd aller der sampnvng dacz sand Bernhart vmb zwelf phvnt phenning der gemainen munzze vnd vergich, daz ich di werung vmb daz vorgenant gvt alle emphangen han vnd han ist auch auf gegeben ledichlichen mit sampt meiner havsvrowen vnd mein chinden mit allem recht der vorgenanten Aptessinne vnd ir sampnvng, vnd gelob auch mit sampt meiner havsvrowen vnd meinen chinden rechten scherm, alz landez recht ist, vnd ze pezzer staticheit so secz ich vur mich vnd fvr mein vorgenant hausvrowen vnd chinden vnd fvr alle ansprach purgel den oft genanten vrowen Gotschalchen von Vronhoven Hainreichen den Dachpeken, Engelprechten von Grveb Heinczlein den Grellen vnd Ludwich von sant Marein, di all mit aygnem willen gelobent ab ze legen allen schaden, der den egenanten vrowen an dem gvt macht chomen, daz si von mir habent gechauffet. Si gelobent auch meinev chind da zv pringen, daz si daz gvt auf geben, swan si zv dem alter choment, daz sev daz ze recht tven schullen. Daz awer disew dinch immer stet beleiben, want ich nicht insigels han, daz mein aygen sei, so gib ich in disen prief versigelten mit dem insigel dez erweren hern gehaizzen Seyfrid der Apt von Altenburch vnd meines hern hern Stephans des edln mannes von meyssaw, der marschalch ist in Osterrich. Diser dinch sint geczivg her Adlolt vnd sein svn her Hainreich vnd her Chvnrat von Cheyaw her Herman vnd her Wulfing von svmberg, her Haug vnd her Ott von Liechtenvels, di dinstherren sint in Oesterreich, herr Wolfhart von Durrenpach, her Hainreich von Bernharczdorf, di ritter sind, her Hainreich von Wiltperch her Levtwein sein aydem, di chnappen sint vnd manich ander vrum mann. Diser prief ist gegeben da von Christes gepurt warn tavsent Jar vnd zwai hvndert vnd Nevnczig vnd nevnev an dem achten tag ze der Liecht Messe vnser vrowen.

Source Fulltext: ZEIBIG, Stiftungsbuch (=FRA II/6, Wien 1853) S. 267-268