Wir Albrecht von gots gnaden hertzog ze O/esterreich, ze Steir und ze Kernden veriehen und tu/on chunt offenlich mit disem brief, daz wir angesehen haben die trew und vreuntschaft, di uns unser besunder lieber vreunt ertzbischolf Heinrich von Saltzburch getu/on mag und haben im und seinem gotzhous erloubt, daz er oder sein nachkomen den marcht datz sand Andre in dem Lavental umb mauren und umb graben sol und vestenn als ez im und seinem gotzhous aller nutzest sei und verbieten, daz in oder seinem nachkomen niemant daran irren sol in dheinem weg. Und das ze urchund geben wir im und seinem gotzhous disen brief besigelten mit unserm insigel. Der geben ist ze Wels am sunntag vor sand Go/ergentag nach Christes gepurt dreuzehenhundert iar darnach in dem no/eun und dreizzigisten iar.||
S.^a)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 446-447.