Nos Chvnradus dei gracia sancte Saltzburgensis ecclesie archiepiscopus apostolice sedis legatus, Fridericus prepositus, Helmwicus decanus totumque capitulum eiusdem ecclesie, Emcho eadem gratia Frisingensis episcopus, Gerhardus prepositus, Gotefridus decanus totumque capitulum ibidem et Chunradus eadem gratia episcopus Ratisponensis, Chvnradus prepositus, Chvnradus decanus totumque capitulum eiusdem ecclesie omnibus, ad quos presentes pervenerint, salutem in omnium salvatore. Eya mater ecclesia tot salutaribus libertatibus ac iumunitatibus refulget, quod quodammodo novis quibuslibet insigniri opus non esset, si antique fideliter servarentur. Sed quia quorundam obstinata malicia laycorum, quos clericis opido infestos tradit antiquitas, nichilominus nititur in vetitum, dum timore dei postposito suis finibus non contenta ad illicita frena relaxat et iusticiam negligens honestatis regulam canonum ac imperialium sanccionum non adtendens novos modos interdum cudit ad ecclesiasticam libertatem penitus enervandam prelatis ecclesiarum ecclesiasticisque personis regularibus et secularibus prediis nec non hominibus eorum onera gravia collectas et talias imponendo et quod dolentes referimus non adtendens quam sit ei in clericos ecclesiasticasque personas eorum servos et bona interdicta potestas ipsos ipsas seu ipsa sue conantur submittere dicioni expedit pastores prelatos et rectores, quibus credita est tutela et cura ecclesie sancte matris, nonnumquam immunitates libertates ac ecclesiarum privilegia publicare penasque transgressoribus impositas penis recentibus aggravare et contra talium ausus et conamina apponere remedium oportunum, ne desidia disciplinam perdat et ut sancte matris ecclesie plena libertas iurisque sui integritas, que in omnibus et per omnia sibi debetur, optata proveniat, preservetur a noxiis et felicibus semper proficiat incrementis necnon ipsius clerus ab opprimentium protectus incursibus sedeat, sedendo quiescat, in pulchritudine pacis in tabernaculis fiducie et temporalium requie opulenta. Proinde nos propter eventus rerum varios, quos experimento didicimus consilio et auxilio mutuo et subvencione reciproca plurimum constat indigere, cum secundum sacros canones non solum socium socius, verum eciam vicinus vicinum a violenciis et oppressionibus teneatur modis quibus potest defensare, multomagis nos, quos frater na iungit concordia, quodam unionis clipeo adversus eos convenit exurgere, quorum molestiis sine intermissione sancta mater ecclesia fatigatur. Unde nos cogente zelo rectitudinis exurgere volumus contra eos, qui ecclesiasticam libertatem ac immunitatem ledere ac minuere moliuntur, procuratores et nuncios et tractatores speciales deputavimus¹⁾ ad tractandum de tuenda pace ecclesie et libertate et immunitate ipsius, qui Saltzburge in unum convenientes ex potestate eis tradita ordinaverunt, quod quicumque nostrum interdicti sentenciam in terras alicuius principis ducis vel comitis advocati baronis ministerialis vicedomini capitanei iudicis provincie vel civitatis cuiuscumque vel in cuiuslibet alterius cuiuscumque condicionis preeminencie et status extiterit pro eo protulerit, quod talias collectas exacciones steuras seu superinducta imposuit vel imponet ipsi vel ecclesie sue vel prediis suis seu ecclesie sue non distingwendo, quis ea inhabitet vel servis ac mancipiis suis seu ecclesie sue ubicumque locorum fuerint constituti vel eciam bonis, que ab eo vel ecclesia in feodum tenentur, ceteri in civitatibus et dyocesibus suis cum primum ad eos seu ad noticiam eorum predicta sentencia pervenerit teneantur similiter terras illius, quas in dyocesibus et civitatibus eorum habuerit, ecclesiastico supponere interdicto. Idem per omnia si per aliquem nostrum in terras advocati ecclesie sue, interdicti sentenciam promulgaverit pro eo, quod ultra debitum servicium ecclesie vel bonis ac servis ipsius aliquid imposuit vel duxerit imponendum vel in terras ipsius, qui hoc nomine advocati imponit vel imposuit, observare decreverunt. Si vero in predictas personas vel aliquam illarum aliquis nostrum ob causas predictas vel causam sentenciam excommunicacionis vel suspensionis protulerit vel alias ipso facto incurrerint vel incurrerit, alii eandem sentenciam teneantur publicare in civitatibus et dyocesibus suis et a subditis suis inviolabiliter usque ad satisfaccionem condignam facere observari, ut sic ad punienda scelera perversorum celeritate commuui nobis in vicem succurramus. Et ut predicta per procuratores nostros ordinata maioris virtutis auctoritatis roboris ac efficacie sint et esse videantur, nos ipsa approbamus ratificamus confirmamus et corroboramus per presentes promittentes fide nostra vice prestiti sacramenti ipsam ordinacionem, ut supra dictum est, absque omni excepcione tenere adtendere et observare et in nullo contravenire verbo vel facto, renunciantes omni privilegio canonis sive legis nunc nobis competenti seu eciam in futurum. In quorum omnium evidens testimonium presentes litteras nostrorum sigillorum munimine duximus roborandas. Actum et datum Saltzburge anno domini millesimo trecentesimo sexto, in die beati Egidii.||
S.^a) S.^b) SD. S.^c) S.^d)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 285-286.