Venerabili in Christo patri et domino suo quam plurimum reverendo ac benefactori precipuo domino R(udolfo) dei gratia sancte Salzeburgensis ecclesie archiepiscopo apostolice sedis legato Bartholomeus de Fulg(ineo) eius ubique devotus et in Romana curia procurator se ipsum et fidele servicium iuxta posse. Noverit vestra paternitas reverenda me vestras litteras recepisse a magistro Burchardo curie vestre notario et ipsarum tenore plenius intellecto, que continebantur in eis, curabo pro viribus adimplere et toto posse ducere ad effectum. Scientes quod hucusque contra vos et ecclesiam vestram Salzeburgensem ac officiales vestros et eiusdem ecclesie non fuerunt alique littere apostolice impetrate sine conventione iudicum et locorum. Et ideo non fuit necesse aliquem alium adiungere ad defensionem vestram in Romana curia in vestro procuraturio una mecum, quia per me sicut scitis et probastis operis per effectum omnia vestra negotia cum diligentia et sollicitudine in predicta curia procuravi et vobis remisi totaliter expedita meis laboribus et expensibus. Et deus scit et beata virgo, quod postquam fui vester procurator in curia supradicta omnibus computatis tam pro meo salario quam etiam pro expensis non recepi nisi XX florenos a magistro Burchardo notario vestro alias et modo X et a magistro H(einrico) de Cosse^a) preposito Frisacensi duas capas antiquas^b) unam videlicet, quando recessit ultima vice modo de bladete et aliam alias de camelino et vos etiam iudicate, si est mihi de predictis plenarie satisfactum, quia sicut alias vobis scripsi et per meas litteras^c) singnificare curavi, quod solummodo in litteris impetrandis et contradicendis et cautionalibus et conventionalibus ac alias litigando cum vestris adversariis expendi XV florenos aureos et nichilominus postquam habuistis causam cum domino duce Austrie perdidi procuratorium domini abbatis Ammontensis,^c) a quo singulis annis habebam duas marcas argenti cum dimidia, et ab episcopo Patauiensi perdidi procuratorium similiter, a quo recipiebam etiam singulis annis tres marcas et a capitulo predicte ecclesie duas marcas et procuratorium similiter perdidi. Et omnia ista sustinui propter vestram reverentiam et honorem. De beneficio autem mihi promisso a vobis, id est diu, videlicet de canonicatu ecclesie Frisacensis qualiter factum sit non est necesse scribere, quia bene scitis. Quare paternitatem et dominationem vestram duxi presentibus deprecandam precibus subiectivis, quatenus mihi vestro clerico subdito et devoto aliquam satisfactionem condignam de predictis impendere dignemini propter deum, quia peccatum esset, si de predictis omnibus aliquam retributionem a vobis^d) seu meritum non haberem. Remitto enim vobis I procuratorium per eundem B(urchardum), quia habere voluit preter voluntatem meam vestram. Dat. apud Vrbem veterem XX die mensis iunii.||
SD.^e)||
Außen: Domino R. dei gratia sancte Salzeburgensis ecclesie archiepiscopo apostolice sedis legato.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 488-489.