[27. Mai 1711] Congregatio privata 27. Maii. Incipiebatur tractari negotium ratione medicastrorum an vi an vero suaviori modo instituendum esset, considerando vero a longo tempore per violentiam non solum nihil effectum sed potius crabrones irritatos fuisse, imo assistentiam brachii saecularis nobis omnino disputari absque hoc vero vanae sine viribus irae forent, ad haec defuncto caesare privilegia nostra remorationem in confirmatione aut plane mutilationem pati possent praesertim cum (ut a saeculo acta monstrant) vix unquam in possessione quieta fuerimus, conclusum est, ut tantisper a violentia nos contineamus non obstante, quod me ad exequendum paratissimum obtulerim, in rei veritate autem tantam in molem excrevere hujus farinae homines [fol. 238v] utriusque sexus instar zizaneae, ut Herculeo pene labore opus esset in extirpanda hac hydra, quare superiori conclusioni inhaerendum esse pro hoc anno et donec privilegia confirmata essent, statutum est: chirurgos, pharmacopoeos ac balneatores monendos esse, ne in perficiendis formulis a talibus medicastris, ut et extrafacultistis praescriptis tam faciles essent et a praxi omnino medica desisterent, quod et in particulari et visitationibus uti etiam per decretum factum est.

Citantur juniores obstetrices et examinantur ratione inscriptionis adjutricum, quarum paucae deprehensae fuerunt habentes discipulas, quibus acriter et sub poena interdictum, ne discipulas citra specialem licentiam facultatis suscipiant.

Praesentatur a cardinale duce de Sachsenzeys37 examinandus chirurgus Otto Ferdinandus Zencker et admissus est.