[12. Februar 1689] Die 12. Februarii litigium inter dom. Danielem Schrader aulae actualem chirurgum ejusque socium Hartmannum Schwer [fol. 76r] ex una parte et dom. Joannem Michaelem Lauter civitatis Viennensis quaestoratus famulum (Steurdiener) ex altera parte compositum et cum consensu utriusque partis finitum fuit. Facta est a nobis decisio, ut loco 60 flor. pro curatione promissorum 12 imper. reciperent chirurgi, hisque acceptis ab ulteriore patientis desisterent accusatione, patiens e contra ab ulteriore eorundem desisteret diffamatione.

Circa initium Martii balneator Joannes Adamus Pittner von Han auss Böhmen pro examine rogavit, empturus post examen aliquam officinam balneatoriam in urbe venalem. Assignatus est ei dies 17. Martii hora 2 pomeridiana.

In eadem congregatione etiam antiqua lis et discordia inter balneatores opificii Viennensis et Thomam Wetschoni balneatorem in oppido Pfaffstetten examinata et per hoc composita [fol. 76v] fuit, dum balneatores Viennenses publice fateri debuerunt, se de ipso aliquid inhonesti nunquam sparsisse, adeoque nunquam in animum induxisse, impedimentum ipsi in alendis et suscipiendis juvenibus balneatoribus causare.