[18. Dezember 1688] I. congregatio 18. Decembris ex mandato regiminis concernente factam et impressam medicamentorum tam simplicium quam compositorum taxam.10 Comparuerunt citati omnes pharmacopoei Viennenses monitique omnes ut juxta taxam pretium medicamentorum imposterum exigant, sicque mulctam transgressoribus imponendam evitare studeant. Cui mandato pharmacopoei se quidem parituros promiserunt, rogantes tamen, quatenus facultas hanc taxam typis recenter impressam, plurimisque in locis erroneam, diversamque ab ea, quam facultas composuit, corrigere et ad eam formam, qua regimini a facultate fuit praesentata reducere studeat.

Joannes Baptista Potesta linguarum orientalium professor rogavit, quatenus sibi in auditorio medico lectiones suos publicas profiteri imposterum liceret. Verum quia plurima doctorum pars ob varias rationes ejusdem petitioni consentire noluit, repulsam passus est.

Chirurgi civitatis rogarunt, ut juvenum suorum chirurgorum examinibus per duos suos seniores more pharmacopoeorum adesse permitteretur, docentes id ipsum vigore sui privilegii caesarei sibi competere. In quam petitionem, quod ipsimet chirurgi jure suo, si quod ex privilegio habuissent uti longo tempore neglexerint, nunc autem novitatem aliquam non necessariam praetenderent, facultas non consensit.

Anna Catharina Sterzerin obstetrix Peterstorff accusat duos mulieres in eodem pago, obstetricum munere propria authoritate fungentes et aliam insuper in Rodaun rogatque, ut ab ista professione arcerentur. Responsum, curae nobis imposterum fore, ut omnes tales illegitime professionem exercentes vel abigantur vel ad legitimum examen trahantur.

Accusant dentium medicastri Viennae stabiles et a nobis approbati aliam foeminam Leopoldopoli morantem et varia medicamenta publice vendentem. Quibus similiter responsum ut supradictae obstetrici.

Ultimo advocatus noster D. Ozenassek specifiationem non tam laborum suorum, quam etiam expensarum suarum exhibuit. Consensum, ut expositas suas pecunias recipiat, in mercedem 12 imper. accipiat ab antecessore meo ipsi persolvendos. [fol. 75v]