[24. Juli 1612] Vigesimo quarto Julii ad maxime gravia inclytae medicae facultatis expedienda negotia ex officio propius accedens universalem secundam omine domi celebrabam congregationem.

Cujus videlicet potissima instituendae causa fuit et argumentum non urbanorum civilium magistrorum apotecariorum in inclytam medicam facultatem non ferenda malitia quod scilicet antiquitus huic hucusque vel maxime privilegiatae facultati (quo ad artem) turpissime in deterius lapsuri morem non gerant in non

privilegiatorum externorum practicantium medicorum hominum intermittendis

rejiciendisque receptis. Ob quam etiam irrefraenatam quasi innatam malitiam jussi

hac instituta congregatione omnes una comparere coram inclyta medica facultate

debuerunt praetensae utpote malitiei rationem redditum.

Omnis enim subditus suum magistratum respicere debet agyrtarum empyricorum

circumforaneorum homulorum infinitus numerus. Lethiferae indoctissimorum

anabaptistarum in infoelicissimos aegros homines irruptiones perfidorum

Judaeorum ab aliquot saeculis reprobatae medicationes diversissimorum

stimplistarum angularium chymicastrorum extra artis terminos praeparationes

atque occultae in curandis hominibus patientibus apertaeque sub promotorum

gravissimorum dominorum doctorum titulis curationes variae unguentariorum in

populum exclamationes in academicos literatissimosque viros impudentia et

contumeliosa dicta eorundemque sub antiqui Mithridatii et theriacae Venetae

nomine stercoraceorum unguentorum venditationes vagi disculi, distillatores, ficti

balsamistae atque id genus deceptorum pessimorum hominum turbae infinitae.

Extranei grassantes medici fuerunt D. D. Rorer, Viennensis Austriacus Roreri

Viennensis notissimi civis filius D. D. Weis, D. D. Judex collegiati olim D. Judicis

filius evangelicae ut ajunt professionis homines. Quibus commemoratis bullatus

quidam annumerabatur doctorculus juvenaster nomine Chriatianus prioris sectae

homo.

His accedebat ltalia quidam oriundus vulgo dictus doctor pillularum. Ideo reor quia

domi divendendas parare studebat.

Inter Haebreos tres numero fuerunt uti ego in sylva Boemica quam nunquam vidi

in saluberrimo medico studio versati quorum duo germani fratres ex Lucernae

Haebrei aulici quondam medici scilicet tempore serenissimi archiducis Ernesti orti

familia bullatos sese Patavinos (magna laus Patavinis professoribus) in phil. et

med. doctores jactitabant.

Tertius Haebreus Elias Halphames nominatus falsarius fuit. Hic enim lacerata

penitus absumpta tibialia Pragae resarsit Viennae ex se factus medicinae doctor

apertissime sub promoti doctoris titulo medicinam exercuit.

Inter chymicos et pseudomedicos inclytae nationis Germanicae duo nominatiores

vulgo fuere Joannes Spangenberger lutheranus haereticus et alius catholicae

religioni addictus.

Inter distillatores balsamistas et pseudomedicos duo perniciosissimi fuerant Itali

prior Paganus decrepitae senectutis homo exiguae conscientiae alter Berasius

Tridentinus Pagani assecla. Hi penes reverendorum etc. dominorum patrum

societatis Jesu templum transeuntes decepturi homines apertam [fol. 47r]

officinam conduxerant caesarea facultatis privilegia irridentes.

Ex domesticorum Germanorum unguentariorum numero unus vulgo praedicabatur

indignus appellatus Casparus Kranz de Pöttendorff primipilus qui et pseudomedici

sustinere personam non erubuit ad quemcunque patientum vocatus. Nullum

tyrocinium in ludo literario posuit. Simiatus in foro piscario admirabile dictum

arabicum unguentum clamans divendidit.

Kranzii coaetanei fuerunt meritissimi scilicet viri Joannes Kranich et Joannes Gutte

oculistae chirurgi et pseudomedici homicidae. Sub horum tenebriconum vexillo

scriptus militabat quovis asino rudior Widemana. Conclusio: Tam commune

bonum quam proprium commodum considerans facultas omnem praesentibus

omnibus civilibus convocatis pharmacopoeis juxta caesareorum privilegiorum

tenorem externis medicis receptas parandi potestatem ademit suppressit. Et primo

quidem sub poena mulctae judicio facultatis denominanda dein sub poena suarum

per pedellum universitatis occludendarum officinarum.

Despumarant barbam et capillos vellicantes moveri namque rebeles quasi facti

nolebant externos medicos deserturi flecti passi fuerunt.

Quamquam enim ingratissima horum auditui isthaec lex extiterit servatu difficillima visa obedienter attamen reverenterque hanc servaturos se esse unaminiter coram receperunt. Atque ita receperunt ut etiam primus omnium qui ipsorum peccaturus in eam impegerit dividendum invicem ducatorum unum annumerare tenebitur. Ad servandam continuandamque hanc ipsorum legem atque et facultatis recens ratificandum statutum frequens ex improviso suarum visitandarum officinarum munus mihi imposuit facultas nunquam in posterum per subsequentes dominos spectabilis negligendum.

Conclusio in externos medicos circumforaneos et reliquos commemoratos nauci homines omnes: In reliquos supra ordino commemorandos commemoratos omnes unanimiter conclusit facultas: Hosce per universitatis ordinarium pedellum nomine inclytae medicae facultatis sigillatim ad dominum spectabilem vocandos esse et doctoribus quidem amice significandum quatenus illicitam hic loci praxin vitent reliquis serio injungendum nugari ut desinant etiam sub poena carcerali.