[13. April 1562] Decima prima congregatio77 in meo decanatu habita est decimatertia die Aprilis 1562, in qua examinatus est magister Christophorus Siebenhar balneator et quoniam apposite ad puncta proposita respondit, admissus.

In hac congregatione decretum est, ut acta hujus mei decanatus una cum decretis regiminis diligenter adnotarentur; ascriberentur etiam exemplaria literarum testimonialium praeterea decretum [fol. 27v] ad suplicationem Stanislai pedelli honorarium sex talensium, quoniam annos circiter viginti cum academiae tum facultati nostrae diligenter servivisset.78

Sequuntur rationes acceptorum:

In prima congregatione comparuit magnificus dominus Dr. Lazius praecedens decanus. Ab eo primo per pedellum accepi sceptrum, ladulam parvam, in qua sigillum erat in pixide et aureus unus Salzburgensis, ladulam deinde majorem clausam, librum statutorum facultatis et librum novae reformationis cum libro actorum mutilato.

Dedit in ea congregatione mihi praefatus decanus praesens florenos Renonses quatuordecim,79 solidos septem, numos 8. Quae summa acceptorum a decano facit florenos sedecim, solidos quatuor et 24 nummos.

In tertia deinde congregatione examinatus est magister Johannes Hutmannus lytothomus, cujus literas testimoniales et instrumenta cheirurgica vidit facultas et probe examinatum admisit, eique literas testimoniales decrevit. Dedit hic facultati florenos tres, pedello sol. 4, mihi pro sigillo ducatum Hungaricalem.

A Domino Doctore Johanne Aicholcz accepi medium florenum pro novo libro actorum concinnando juxta decretum consistorii.

In hoc meo decanatu valetudinis causa concesseram ad thermas. Interea Dr. Plancus vicedecanum gerebat et examinavit balneatorem quendam Conradum Mauncz, qui prefato Dono Doctori Planco numeravit tres florenos.

Eos facultati solvit Doct. Plancus. Literas illi testimoniales ego conscripsi et dedi et ducatum in auro accepi. Harum literarum exemplar ad acta relatum.80