[8. März 1532] Accidit658igitur, quod 8. die Marcii decanus, convocatis rursus ad se doctoribus circa duodecimam, D. Ioannem quoque Pilhaimer, qui nuper ex legatione venerat, accersiri iussit, qui et congregationi interfuit. Perlachii hesternam petitionem ad consultandum proponit. Placuit doctoribus, ut nihil in scriptis ab eo reciperetur; at si quid facultati haberet dicere, id verbo proponeret, quia facultas nullam ab eo susceptura esset scripturam. Perlachio intromisso sententia doctorum per decanum proponitur, et cum peteret rursus, uti sue mentis conceptio acciperetur, renuit facultas et eum, si memoriter recensere rem suam, ut causabatur659, non valeret, ex scheda in suis manibus retenta legere iussit, quod factum est. Sed quoniam in ea petitione [fol. 115r] videbatur Perlachius ad id refugere, quod antea recusavit, — cupiebat enim, ut facultas Colimicio rescriberet, et si infra mensis spacium non responderet, res sua apud facultatem salva foret atque invito Tannstetter admitteretur —quod facultas variis de causis abnegavit et in priori mansit decreto. Cum vero Perlachius videbat, se nihil posse consequi, sua propemodum culpa, eo quod antea fidele facultatis consilium parum praemeditate, imo inconsulto660spreverat, sequentibus diebus iterum sollicitare cepit pro copiis literarum, id quod antea fuit denegatum, et missa desuper de novo per decanum scheda ad doctores, ex votorum pluralitate iterum denegatum est.