[13. Oktober 1508] Die Colomani divi Martiris, que erat 13 Octobris, habita est facultatis congregatio propter sequentes articulos.

Primo ad audiendum duos dominos doctores novellos, Ioannem Encianer et Georgium Obsinger, ad consilium facultatis petere volentes. Porrecta eorum petitione, mox exauditi sunt et ambo benivole ad facultatis consilium admissi, prius tamen ad manus decani servanda velle servare iuravere et in huius negotii testimonium unusquisque eorum dabit facultati unam octavam de optimo malmatico.

Secundo ad eligendum decanum pro hiemali mutatione. Facultas ob certas pregnantes causas eam moventes pro tunc electionem huiuscemodi suspendit; que tamen eligendo289decano presentanda erant, facultas priori decano ad novi decani electionem interea loci commisit.

Et tandem facultas decrevit et subordinavit decanum priorem doctorem Udalricum Cervum et doctorem Ioannem Neuman et doctorem. Guilhelmum290 Puelinger ad accedendum Seniores universitatis, puta aliarum facultatum decanos, et coram eis nomine facultatis lamentari de variis erroribus in electione rectoris per multos annos commissis et singulariter in presenti scelesta, perfida et iniqua procuratorum electione, que, sicuti cuilibet liquet, cum dolo et fraude celebrata est. Preterea prefati Seniores universitatis invocandi et petendi sunt, ut eorum suffragio universitatis congregatio fiat, ubi facultas coram tota universitate nedum sua, verum eciam aliarum facultatum gravamina lamentabiliter proponere velit. Speraret denique facultas, quod universitas huiuscemodi lites, discordias, factiosas conspirationes et tot odia oculta in universitate latentia aliquando cordi recipere velit, ita ut horum omnium fieret extirpatio eradicatioque, et tandem perpetue pacis et tranquillitatis reformatio.

Quod quidem negotium prefati deputati tres doctores mox die sequenti maxima diligentia expedierunt.