[21. Oktober 1479] Anno Domini 1479., feria quinta in die undecim mille Virginum, in domo facultatis medicine fuit congregacio facta super articulo illo, quid ulterius sit agendum in causa vetule, ut pro honestate facultatis ad bonum deducatur finem. Et placuit protunc certis doctoribus, ex quo judex esset hic, videlicet abbas Scotorum, tunc deberemus coram eo ulterius procedere. Qui se per se voluntarium obtulit nobis, sed timor fuit ex parte procuratoris vetule, qui fuit tunc jurista domini abbatis. Et certis placuit, quod facultas deberet mittere ad dominum [fol. 101v] legatum ad Grecz, et fuerunt illi deputati a facultate, quorum unus voluit se personaliter illuc presentare ad dominum legatum, cuius noticiam bene haberet, si haberet a facultate pecuniam pro sumptibus. Deinde senioribus missis clavibus ad archam domino decano, qui aperuit archam et recepit ex archa 12 flor. Ungaricales, et manserunt 20 in archa, et tunc commiserunt decano, quod in necessario deberet ipsis deputatis presentare. Feria sexta post venit ad me dominus doctor Mag. Iohannes Dychtel sub porta ecclesie monasterii sancti Ieronimi et presentavit michi litteram sigillatam sigillo domini doctoris Mag. Michahelis Meynesdorfer vel suo, et littere tenor fuit, quod ambo doctores prescripti petiverunt 12 flor. Ungaricales sibi dari, quos precedenti die ab archa recepi, et sic feci et dedi domino doctori Mag. Iohanni Dychtel, ut cum illa pecunia vetula, que practicavit contra voluntatem facultatis, repelleretur et ab illo loco ammoveretur, ne homines amplius ab ea deciperentur. Et tunc statim post dominus doctor Mag. Michael Meynesdörfer cum fratre suo et famulis equitaverunt ad Grecz in causa vetule et coram domino legato expedivit causam, ut postea patebit in computo.