Ich perchtolt von Dornech vergich an disem prief sampt meiner hausvrowen vron Dyemvten vnd mit allen meinen erben allen levten, di in sehent, lesent, ader horent lesen, di nv sint oder hernach chvnftig werdent, daz ich meines rechten vreyn aygens ein akcher, der da haizzet in dem Revtgraben pei Siczendorf verchavft han Otten dem Hvetter von Radwasdorf der geistlichen vrowen holde von sant Bernhart vmb drei phvnt wienner phenning, der ich recht vnd redlich gewert pin, also beschaidenlich, ber den selben akcher inn hat, daz er dien schol zwen new phenning dem Chamer ampt dacz sant Bernhart in dem chloster an sant Michelstag, vnd anlait vnd ablait auch zwen phenning, vnd daz disev sach also stet peleibe vnd an chrieg, giw ich dem vorgenanten Otten dem Huetter disen prief zv einem offen vrchvnde diser sache versigelt mit meinem insigel. Dez sint gezevg, Stephan mein prvder, prvder Nicla ze den zeiten Caplan dacz sant Bernhart, prvder Lienhart hofmaister in dem alten hof. Der prief ist gegeben, da von Christes pvrt ergangen sint dreuczehen hvndert Jar dar nach in dem sechs vnd vierczigisten Jar an sant Gregorgen tag in der Vasten.

Source Fulltext: ZEIBIG, Stiftungsbuch (=FRA II/6, Wien 1853) S. 253-254