Ich Reinprecht vnd Fridreich prueder von Walsse von Ens veriehen offenwar vnd tuen chunt allen den, di disen prief sehent, lesent oder horent lesen, die nu lebent oder hernach chumftich sind, daz wir mit wolbedachtem muet vnd mit gutleichem willen vnd auch nach rat vnserr pesten vrewnt ze der zeit, do wir ez wol getuen mochten, recht vnd redlich getailt haben also beschaidenlich, daz mir vorgenantem Reimprechten vnd meinen erben mit rechtem tayl ist geuallen die vestt Schaernstain mit alle dew, vnd dar zw geho^ert, swie so daz genant ist vnd dar zu di vischwaid auf der Lawtoch an den zehent ze Lochchirichen vnd den hof ze Gastaig vnd die hueb an der Strazz vnd swaz dar zw gehoert, als wir daz von den Rorern ee haben gechaufft, daz mit rechtem tayl ist geuallen zu der vest gen O^ert. Dar zu ist mir gevallen mit rechtem tayl die vestt Sewsenekk mit alle dew, vnd dar zu geho^ert, swie so daz genant ist. Mier ist auch dar zw^e geuallen alles daz gu^et, daz wir ze Larich gehabt haben, daz pei der stat ze Ens ist gelegen, Swie so daz genant ist, vnd die guetel zwischen den wazzern gelegen, daz gu^et ze Helffenberch mit alle dew, vnd dar zw^e geho^ert, swie so daz genant ist; vnd dar zu ist mir geuallen der hof ze Vbensee pei Lengpach gelegen mit pawe vnd zehenten vnd mit alle dew, so dar zw^e geho^ert. Die vorgenanten zwo vestte Schaernstain vnd Sowsenekk mit alle dew, so dar zw^e gehoert, ez sein fo^erste, wald, s/^e, vliezzunde wazzer, vischwayd, wismad, aecher, in vrbar, ze holcz, ze veld vnd ze dorff, ez sei gestifft oder vngestifft, versu^echt oder vnuersuecht oder swie so daz genant ist vnd owch mit sampt den vorgeschriben guetern, die dar auf sint getaylt, ist mir vorgenantem Reimprechten von Walsse vnd meinen erben geuallen an ainem tayl; da engegen an dem andern tayl ist mir vorgenantem Fridreichen von Walsse vnd meinen erben recht vnd redlich geuallen die vestt Ort in dem Trawnse gelegen mit alle dew, so dar zu gehort als wir dar vber besunder prief haben von vnsern oehaimen von Rauhenstain vnd von Winchel, mit dem vorgenantem zehent ze Lochchirichen vnd den hof ze Gastaig, die Hueb an der Strazz, daz dar auf ist getailt, als vor geschriben stet vnd dar zw die vestt Sumerowe vnd swaz dar zw gehort; vnd dar zw ist mir geuallen die vestt Herttenstain vnd swaz dar zwe geho^ert, die vorgenanten drey vestt Ort, Sumerow vnd Herttenstain an dem andern tayl ist mir Fridreichen von Walsse vnd meinen erben geuallen mit alle dew, vnd dar zu gehort, ez sein gerichtt, forstt, wald, sê, vliezzunde wazzer, vischwaid, wismad, aecher, ze holcz, ze feld vnd ze dorff, ez sei versuecht oder vnuersuecht oder swie so daz genant ist, als hie vor verschriben ist also mit auzgenommen red, swaz ich e genanter Reimprecht von Walsse vnd mein erben haben verlehencz guetes, daz zu den zwain vnsern e genanten vestten Schaernstain vnd Sowsenekk an ainem tayl gehort, ez sein manlechen oder chirichlehen, die sol mein prueder Fridreich vnd sein erben mit vns haben vnd leyhen. Swaz ich dann ee genanter Fridreich von Walsse vnd mein erben haben verlehencs guetes, daz zu vnsern drin vestten Ort, Sumerow vnd Herttenstain an dem andern tayl gehort, ez sein manlehen oder chirichlehen, die sol mein prueder Reimprecht vnd sein erben mit vns haben vnd leihen. Daz diser tayl vnd di sach also paidenthalben von vns vnd allen vnsern erben staet vnd vnczebrochen beleib, dar vber geben vnd bestaetten wir disen offenn prief zu einem ewigen warn geczewgen diser sach mit vnsern anhangunden insigiln bestaetigtt vnd durch pezzer sicherhait mit vnsers lieben vetern Eberharts von Walsse von Lincz, Eberharts vnd Hainrichs von Walsse von Drosendorf anhangunden insigeln vnd mit vnsers lieben oehaims Johansen von Chappelln, vnsers oehaims Perichtolts von Losenstain insigeln vnd dar zu mit vnsrer ritter vnd diener insigeln, hern Weycharts von Pernow, hern Walthers vnd hern Hansen pruedern von Sowsenekke vnd Perichtolts Scheuolts, di pei dem tayl sint gewesen. Geben ze Ens nach Christi gepurde dreuczehen hundert jar, dar nach in dem funfczkisten jar an sand Pauls tag, als er bechert warde.

Quelle Volltext: OÖUB 7 (Wien 1876), S. 164ff., Nr. 165