In nomine Domini amen. Universis presens scriptum visuris et audituris Hadewigis abbatissa ecclesie sancte Marie in Capitolio Coloniensis in perpetuum. Quia gesta hominum, que circa temporales actus fiunt, scripture testimonio fulciri consueverunt multo forcius, pia vota fidelium et beneficia, que impendunt ecclesiis, perpetuari scripturis expedit, ut eorum memoria oblivioni non tradatur et aliis sint benefaciendi ecclesiis in exemplum. Itaque tam presentes quam futuros scire volumus, quod Daniel dictus Judeus miles, scabinus Coloniensis, cui sepulturam hereditariam concessimus ante ianuam chori nostri ex opposito altari sancte Crucis in ecclesia nostra de consensu reverendi patris domini Sifridi archiepiscopi Coloniensis et consilio tocius conventus nostri, cui sepulture corpus filie eiusdem Danielis est recenter impositum, pro salute animarum sue et suorum cogitans redditus duarum marcarum hereditarii et perpetui census pro sua uxoris, filie et parentum suorum habenda memoria deputavit, quos erga nos .. abbatissam predictam emit seu comparavit et numeravit ad hoc idem Daniel viginti quinque marcas denariorum Coloniensium in subsidium emptionis curtis in Efferne et bonorum attinencium. Quam curtem et bona nos .. abbatissa comparavimus seu emimus erga Johannem militem de Are, qui eandem curtem et bona tenuit a nobis titulo feodi et perpetuo iure reduximus in manus nostras et .. successorum nostrarum, qui pro tempore fuerint, ita quod nos et .. successor nostra, que pro tempore fuerit, de eisdem bonis et curte solvemus et dabimus easdem duas marcas in perpetuum singulis annis in aniversario dicti Danielis et distribuentur sororibus et confratribus ecclesie nostre predicte fietque ipsius Danielis, uxoris, filie sue et parentum suorum memoria cum vigilia, missa animarum et commendacione, prout in nostra ecclesia fieri est consuetum promittentes et obligantes nos et .. successores nostras de consilio et consensu conventus nostri ad solvendum censum predictum de bonis predictis perpetuo pro agenda memoria dicti Danielis et suorum perpetuis temporibus, prout superius est expressum. Et ne nos aut .. successor nostra, que pro tempore fuerit, censum huiusmodi minuere vel subtrahere presumamus vel quoquo modo possimus, presens scriptum sigillis nostro et ecclesie nostre dicto Danieli et heredibus suis nostroque conventui damus perpetua obligacione sigillatum. Insuper ad maioris testimonium firmitatis sigillum reverendi patris domini Sifridi archiepiscopi Coloniensis rogavimus presentibus apponi. Et nos Sifridus archiepiscopus Coloniensis approbantes et commendantes pium votum Danielis predicti in hac parte ad preces prefate .. abbatisse sigillo nostro fecimus presentem paginam in perpetui robur testimonii communiri. Actum anno Domini millesimo ducentesimo octuagesimo primo feria sexta proxima post festum beatorum apostolorum Petri et Pauli.