Ich Michel der Vtendorffer vnd ich Nicla der Jued vergehen vnd tuen chund allen lewten, daz wier mit wolbedachtem muet vnd mit guetleichen willen ingeantwuert haben recht vnd redleich aws vnser nuetz vnd gwer in die iren dem erwirdigen vnd geistleichen herren Abpt Nicla ze Gersten vnd seinem gotzhaws die Gueter daz Moln, di wier gechauft haben von dem erbern chnecht Thomam dem Haiden vnd seinen erben, die wier auch gechauft haben von dem Gelt, daz der erber Ritter her Symon der Venkk seliger dem egenanten gotzhaws geschafft hat, vnd haben daz getan in der beschaiden, daz wier noch all vnser erben furbas dhain ansprach gegen den Guetern haben noch gewynnen schullen noch mugen, weder mit recht noch an recht, vnd tuen vns auch des ze fuertzicht mit dem gegenwurtigen prief. Daz die red also stet vnd vnuerchert beleib, darveber geben wir obgenanter Michel der Vtendorffer vnd Nicla der Jud fuer vns vnd fuer all vnser erben den prief versigelt mit vnser paider anhangunden insigeln vnd durch pezzer sicherhait mit der zwayer erbern Perchtolds Am Aygen vnd Hermans des Muelrieder anhangunden insigeln, di irew insigel zu zeug dar an gehangen habent in an schaden. Der prief ist geben do man zalt von Christs gepuertt dreutzehen hundert iar darnach in dem Siben vnd sibtzigistem Jare an vnser frawn tag zu der Liechtmesse.