Ich. Rvdolf der Wirsinch, Tvn chvnt allen den, die nv sint. vnd her nach chvnftich werdent, Daz ein chriekh was zwischen mir vnd dem ersamen herren Apte Chvnrat, vnd dem goteshavse datz Sitansteten, vmb die vogtay avf dem Aigen ze Lanzendorf, vnd swaz dar zv gehoret, des satzten wir vns beidenthalbe an die vmb saezzen, die eltisten, vnd die besten, an hern Meinharten von Raevtte, hern Perhtolden von alten Lengenpach. hern Heinrichen von pavngarten, vnd hern Seifriden von Hagenowe , die habent vns also gescheiden. vnd den chriech verslihte, Daz ich driv taidinch, vf dem Aigen ze lanzendorf||
haben sol, eines ze sant Michels Messe daz ander ze vaschange, daz dritte an sant Georin tage. vnd ze iegelichem taidinge svln mir die levte ein Mal, selb nevnten geben, vnd swen ich der Mal niht nemen wil, so svln si mir geben fvr iegelich Mal sehzich phfenninge. vnd avf zwein hoefen zwo naht selde, da sol ich selbe dritte sin, vnd wil ich da niht hin, so svln mir die levte geben, fvr iegelich naht selde drizzich pfennige, Ez svln avch des goteshavses levte ab dem walde div taidinch svchen ze lanzendorf, vnd ninder ander swa. Swen ich an dem taidinge sitze, swaz da gervget wirt, vmb plvt rvnse, vmb Mavlslege, vmb chnvttelslege, swaz des vor mir gervget vnd geschlagt wirt, div wandel sint mines herren des aptes div zwei teil, vnd des voites daz ist min daz dritteil. Swaz des andern ist, daz sol rihten des aptes Amman, Swaz aber geschiht, tot slege, oder dief, oder Notnvnft. oder prant. swi des ein man schvldich wirt, da sol sich sines gvtes, mines herren des aptes Amman vnder winden, vnd soln div zwei teil sein sin, vnd daz drittail min. Ist daz der landes Herre hervertet vz dem lande, oder ez sei, daz in dehein sin nahtgepawr an greiffe, gein dem er vert an sinw gemerke so svln mir die vorgenanten voitlevte geben zwei pfvnt fvr einen wagen, vnd sol daz geschehen wanzeinmal in dem Jar. Swaz herverte fvrbaz wvrde in dem selben Jar, da sint mir die levte niht schvldich ze geben. Man sol mir ovch geben von igelichem lehen drei Metzen voit habern, vnd von einem lehen, heizzet pvnlant, sehs Metzen habern, vnd von zwein hoeuen zwelf Metzen habern, von hofsteten. von lehen. von Meirhoven. von iegelichem ein vaschanch hven, So gebent mir die levte vf dem walde ze voit reht sehs vnd drizzich Metzen habern, ze sant Georin Messe, vnd vier vnd sehzich pfennige zten drin vorgenanten taidingen, vnd ze vaschange sehs hvener. vnd dar vmb sol ich daz vor genant aigen levte vnd gvt, vnser frowen ze dinest schermen. vnd mir enpholhen lazzen sin, als ich aller peste chan von minen triwen. Daz disiv rede von mir staet beleibe, vnd vnvercheret, so han ich dem vorgenanten ersamen apt Chvnrat, vnd dem goteshavse dar vber gegeben disen prief ze einem vrchunde vnd ze einem ewigen gezevge. gevestent mit minem Insigel, vnd mit der erwerigen ritter Insigel, die hie geschriben sint, hern Meinharts von Raevtte, hern Perhtoldes von alten lengenpach, Hern Chvnrats von Artzlinsdorf, Hern Seifrides des schenchen. Des sint gezevge. Her Gotfrit von totzenpach, Her Heinrich von pavngarten, her Seifrit von hagenow, Rudolf der tozenpekh, Ditmar der schench, Dvrinch der schench, Gotfrit von Raevtte, Chvnrat von Hagenowe, Peter von vinchenperge vnd Seifrit der amman von Lanzendorf. Daz ist geschehen, do von Christes gepvrte waren tavsent Jar, zwei hundert Jar, vnd Nevn vnd Nevnzich Jar, an dem Ohten tage nah sant Cholmannes tage.

Source Fulltext: RAAB, Seitenstetten (=FRA II/33, Wien 1870) S. 125-126