In nomine sancte et indiuidue Trinitatis. Odalricus gratia dei Patauiensis ecclesie episcopus. Omnibus Christi fidelibus perpetuam in domino salutem. Etsi propter officium cure pastoralis, quam diuina ordinante gratia suscepimus, omnibus Christi fidelibus debitores existimus; precipue tamen paci eorum et quieti prospicere debemus, qui uel priuato iure fundationis nostre tenentur ecclesie, uel qui maiori sancte religionis disciplina sub nostra cura noscuntur prepollere. Qua propter uniuersitati omnium ac presentibus scilicet et futuris notum facimus, quod quidam Udalscalchus nobilis et liber homo de Stille cellam monachis in honore s. Marie dei genitricis in allodio suo Sitansteten construxit et omne patrimonium suum apud iam dictum locum uel apud Grunenbach. et Stille, et Hefte, cum capellis inibi edificatis. et cum omni familia sua. larga et potestatiua manu in dotem pro remedio anime sue et omnium parentum suorum ad prenotatam cellam contradidit. Et hoc quoque factum suum ut ratum et inconuulsum in posterum permanere debeat. quasi sub tuitionem contra malignorum uiolentiam. ad altare s. Stephani in maiori ecclesia patauie eandem cellam delegauit. tali scilicet conditione. ut abbas et fratres eiusdem monasterii liberam in perpetuum habeant potestatem. elegendi sibi aduocatum de cognatione fundatoris. ita uidelicet. ut modios et animalia nullam habeat potestatem ab eiusdem ecclesie rusticis exigere. Idem etiam aduocatus si fuerit inutilis. et monasterium per aliquam uiolentiam oppresserit. item abbas et fratres nichilominus habeant libertatem. eundem aduocatum amouere. et utilem et bonum de predicta cognatione illi substituere. Patauiensis quoque episcopus si indiscrete iam dictum monasterium per uim aut iniusto dominio oppresserit. cognati fundatoris in altare S. Stephani aureum ponant. et iam deinceps libere idem monasterium ad aliam ecclesiam. ubi eis placuerit transmittant. Nos quoque cum consensu fratrum de choro et ministerialium nostrorum. parrochiam aspach cum omnibus suis titularibus ecclesiis. adalhartesperge scilicet. et Piberbach. et Chrebesteten. cum omnibus capellis in ea iam edificatis uel edificandis. cum omni iure sacerdotali. et cum omnibus decimis. que uel socerdotis uel nostri iuris esse noscuntur. ad eandem cellam tradidimus his solis exceptis. quas secularibus in beneficium constat esse innodatas. Decimationes etiam noualium. que uel in presenti uel deinceps exculta fuerint ex utraque parte fluminis ybese. et ad occidentem usque karintscheide eidem eccelesie contulimus. et eas illi perpetuo iure firmamus. Hec autem nostra et predicti Vdalschalci donatio et statuta ut rata et inconuulsa in perpetuum permaneant. et in carta describi ac sigilli nostri inpressioni precepimus muniri. et si quis ea ausu temerario umquam infringere aut uiolare temptauerit. hunc auctoritate domini nostri Jesu Christi et a communione s. ecclesie eliminamus. et cum diabolo perpetualiter cruciandum eterno anathemate comdempnamus. Huius autem facti nostri testes hii sunt. Gumpoldus. prepositus S. Stephani. Odalricus prepositus S. Nicolaj. Rupertus de S. Sixto. Magister Odalricus. Sigeboldus abbas de medelicha. Dietmarus prepositus de S. Floriano. Dietericus comes de viehtensteine. Odalricus de Willeheringen. Erkenbertus de mosebach. Reinbertus de hagenowe et tres filii eius. Wernhardus, Reinbertus et Hartwicus. Manegoldus de Wesen. Sigeboto de Bornhaim. Hartmut de Persniche. et alii quam plures. Hec autem acta sunt anno dominice Incarnat M.° C.° XVI.° Indict. VIII.^a.

Source Fulltext: RAAB, Seitenstetten (=FRA II/33, Wien 1870) S. 2-4